Rossiya diversiyalari chegaradan o‘tdi – Polsha 

Polsha Bosh vaziri Donald Tusk bugun, 21 noyabr kuni bildirishicha, Rossiya tomonidan ilhomlantirilgan va tashkil etilgan diversiyalar mamlakatni beqarorlashtirish va zaiflashtirishga qaratilgan bo‘lib, ularda “davlat terrorizmi” belgilarini ko‘rish mumkin.

O‘tgan hafta oxirida Varshava-Lyublin yo‘nalishidagi temiryo‘l relslari portlash oqibatida zararlandi. Bu yo‘l Polsha poytaxtini Ukraina chegarasi bilan bog‘laydi. Tusk buni “diversiya akti” deb atadi.

Moskva esa ayblovlarni rad etdi, Polsha hukumatini “rusofobiya”da aybladi va Rossiyadagi Polsha diplomatik muassasalarining faoliyati ham cheklanishini ma’lum qildi.

“So‘nggi hodisalar hech qanday ishonch qoldirmaydi: Rossiya mamlakatimizni beqarorlashtirishga qaratilgan gibrid urushning navbatdagi bosqichini amalga oshirmoqda”, dedi Tusk parlamentda.

Uning aytishicha, Kreml xizmatlari tomonidan bir necha oy davomida ilhomlantirilib, to‘g‘ridan to‘g‘ri tashkil etilgan diversiya amallari yaqin paytda “tanqidiy chegaradan o‘tdi” va buni endi davlat terrorizmi deb atash mumkin.

2022 yilda Rossiyaning Ukrainaga to‘liq hujumi boshlanganidan beri Polsha va boshqa Yevropa davlatlarida bir qator yong‘in chiqarish, diversiya va kiberhujumlar sodir bo‘lib kelmoqda.