Yaponiya Tayvan yaqiniga raketalar joylashtirish rejasidan voz kechmasligi aytildi

north_east

Xitoy O‘zbekistonni Tayvan masalasida ogohlantirgani ma’lum bo‘ldi

Yaponiya hukumati Tayvandan taxminan 110 kilometr uzoqlikda joylashgan Yonaguni orolidagi O‘zini o‘zi himoya qilish kuchlari garnizoniga o‘rta masofali raketalarni joylashtirish rejasidan voz kechmayapti. Bu haqda Mudofaa vaziri Sindziro Koidzumi harbiy ob’ektga tashrif buyurganidan keyin jurnalistlar bilan suhbat chog‘ida ma’lum qildi. 

“Raketalarni joylashtirish mintaqada keskinlikni kuchaytiradi, degan da’volar asossiz”, deydi u. 

U jurnalistlarning Yaponiyaning “Tayvan yaqinidagi harbiy inqiroz”ga qanday munosabatda bo‘lishi haqidagi qo‘shimcha savollariga javob berishdan bosh tortgan – Bosh vazir Sanae Takaitining bu mavzu bo‘yicha izohlari allaqachon Tokio va Pekin o‘rtasida keskinlikni keltirib chiqargan. Yonagunidagi Yaponiya o‘zini o‘zi himoya qilish kuchlari garnizoni 2016 yilda tashkil etilgan. U yerga “Tip-03” o‘rta masofali zenit raketalarini joylashtirish rejalashtirilgan. 

Eslatib o‘tamiz, Yaponiya va Xitoy o‘rtasidagi keskinlik Sanae Takaiti joriy yilning 7 noyabr kuni parlament muhokamasi paytida Tayvan yaqinidagi mumkin bo‘lgan harbiy inqiroz “mavjudlik tahdidi”ni keltirib chiqarishi va Yaponiyani “kollektiv o‘zini himoya qilish huquqidan” foydalanishga majbur qilishi mumkinligini aytganidan keyin kuchaydi. Bu Pekinda kuchli norozilikni keltirib chiqardi va Tokioga jiddiy ogohlantirish berdi. Osakadagi Xitoy bosh konsuli Syue Szyan o‘zining ijtimoiy tarmoqdagi X (sobiq Twitter) akkauntida Yaponiya Bosh vazirining “boshini kesib tashlash” bilan tahdid qildi, ammo keyinchalik post o‘chirildi. Birozdan keyin Xitoy Tashqi ishlar vazirligi vatandoshlarini Yaponiyaga sayohat qilishdan ogohlantirdi. 

Tayvan 1949 yildan beri o‘z ma’muriyati tomonidan boshqariladi, o‘shanda Chan Kayshi (1887-1975) boshchiligidagi Gomindan partiyasining qoldiqlari Xitoy fuqarolar urushida mag‘lubiyatga uchraganidan keyin orolga qochib ketishgan. O‘shandan beri Taypey kommunistlar hokimiyat tepasiga kelishidan oldin materikda mavjud bo‘lgan sobiq Xitoy Respublikasining bayrog‘i va boshqa ba’zi atributlarini saqlab qoldi. Pekinning rasmiy pozitsiyasiga ko‘ra, u Xitoyning hududi va ko‘plab mamlakatlar buni tan oladi.