YeI voyaga yetmaganlarni ijtimoiy tarmoqlardan cheklamoqchi

Yevropa parlamenti bolalarning ijtimoiy tarmoqlardan foydalanishini cheklash bo‘yicha Yevropa Ittifoqiga chaqiriq yo‘lladi. Deputatlar yoshlar orasida ijtimoiy tarmoqlardan ortiqcha foydalanish sabab kuchayib borayotgan ruhiy salomatlik muammolariga e’tibor qaratmoqda. Bu haqda “Reuters” xabar berdi. 

Qayd etilishicha, mazkur majburiy kuchga ega bo‘lmagan rezolyutsiya Avstraliya, Daniya va Malayziya shunga o‘xshash choralarni ko‘rib chiqayotgan bir paytda qabul qilindi.

Fransiya Prezidenti Emmanuel Makron ilgari Yevropa Ittifoqi bo‘ylab 15 yoshgacha bo‘lganlarga ijtimoiy tarmoqlarni taqiqlash g‘oyasini ilgari surgan edi. Biroq yosh cheklovlarini belgilash masalasi hozircha har bir davlatning o‘z vakolatida qolmoqda.

Parlament 483 ovoz bilan qo‘llab-quvvatlagan rezolyutsiyada 16 yoshgacha bo‘lgan bolalarning onlayn platformalar, video almashish saytlariga ota-ona roziligisiz kirishini taqiqlash, 13 yoshgacha bo‘lganlar uchun esa to‘liq taqiq joriy etish taklif qilindi.

Rezolyutsiya muallifi, daniyalik deputat Kristel Shaldemosening ta’kidlashicha, yirik texnologik kompaniyalar – Ilon Mask boshchiligidagi X (sobiq Twitter), Meta hamda TikTok ortidagi Xitoy texnologik guruhlari – bolalarning bir necha soat vaqtlarini behuda sarflashiga xizmat qilmoqda. 

“Biz platformalarga aniq signal bermoqdamiz: bolalar ustida tajriba o‘tkazishni tugating”, dedi Shaldemose.

Shuningdek, parlament qarorida talon-toroj qutilari, real pulga yutib olish yoki sotib olish mumkin bo‘lgan virtual buyumlar va voyaga yetmaganlar uchun jalb qilish asosidagi tavsiyalar algoritmlarini taqiqlash, shuningdek, qonun hujjatlarida kontentning yoshga mos dizaynini talab qilingan.

Eslatib o‘tamiz, avvalroq Tojikiston, Yangi Zelandiya va Turkiyada ham voyaga yetmagan bolalar cheklangan doirada ijtimoiy tarmoqlardan foydalanishi to‘g‘risida g‘oyalar ilgari surilgandi.

Komila Qobilova