Yirik agentliklar Premer-liganing ish haqi chegarasiga qarshi chiqdi

Ingliz futbolidagi uchta eng nufuzli agentlik C Base, C Stellar va Key Sports Management Premer-liganing yangi ish haqi chegarasi tizimini joriy etish rejasiga qonuniy choralar ko‘rish bilan tahdid qilmoqda. Bu haqda “Sports Business Journal” xabar berdi.

Agentliklar yangi tizim klublarning ish haqi, transferlar va agentlar komissiyalariga sun’iy cheklovlar qo‘yayotgani, bu esa raqobat qonunchiligiga zid bo‘lishi mumkinligini ta’kidlagan. Ular rejadan butunlay voz kechishni ham talab qilmoqda.

Premer-liganing taklifi klub xarajatlarini mukofot puli va translyatsiya daromadiga nisbatan besh baravargacha chegaralashni ko‘zda tutadi. Tanqidchilar bu tizim ingliz klublarining Yevropa grantlariga nisbatan ustunligini pasaytirishi va bozor hukmronligidan noto‘g‘ri foydalanishga olib kelishi mumkinligini aytmoqda.

Mazkur masala bo‘yicha Professional futbolchilar assotsiatsiyasi (PFA) barcha 20 klub sardori bilan uchrashuvlar o‘tkazib, o‘zgarishlarning oqibatlarini o‘rganmoqda.

Yaqin kunlarda Premer-liga aksiyadorlari yig‘ilishida ish haqi chegarasi tamoyili bo‘yicha ovoz berish kutilmoqda. Qoidalarning qabul qilinishi uchun klublarning uchdan ikki qismi rozi bo‘lishi zarur. Bu tizim klublarga futbol daromadining 85 foizidan ortig‘ini ish haqi va transfer xarajatlariga sarflamaslikni belgilaydi.

“Manchester Siti” va “Manchester Yunayted” kabi yirik klublar taklifga qarshi ovoz berishi kutilmoqda. Shuningdek, o‘rta darajadagi klublar orasida ham qo‘llab-quvvatlovchilar soni kamligi sababli tizimning qabul qilinmasligi ehtimoli yuqori.

Agar yangi moliyaviy tartib joriy etilsa, bu Premer-liganing ichki raqobatiga, global bozordagi mavqeiga va agentlarning roliga sezilarli ta’sir ko‘rsatishi mumkin. Ushbu qaror atrofidagi tortishuvlar liganing kelgusi siyosatini belgilab berishi kutilmoqda.

 Eslatib o‘tamiz, avvalroq Angliya Premer-ligasi  klublarning ish haqi xarajatlarini cheklovchi yangi tizimni joriy etish masalasida muhokama qilayotgan edi. https://qalampir.uz/news/aplda-ish-%D2%B3ak-i-chegarasi-zhoriy-etilishi-mumkin-125636