АҚШ босими фонида Оттава Кубага қўл узатмоқда

Канада Кубада ёқилғи танқислиги кучайган бир пайтда мамлакатга ёрдам кўрсатиш режасини тайёрламоқда. Танқислик АҚШ томонидан оролга нефт етказиб беришни тўсиш чоралари ортидан юзага келган. Бу ҳақда “CNN” ёзди.

Вашингтон сўнгги ҳафталарда Кубага нисбатан босимни кучайтирган. АҚШ Презиленти Дональд Трамп маъмурияти, жумладан, Венесуэладан келадиган нефтни ҳам тўсиб қўйган. Бу эса озиқ-овқат ва транспорт нархларининг ошишига, ёқилғи танқислиги ва узоқ соатлик электр узилишларига олиб келган.

Канада Ташқи ишлар вазири Анита Ананд ёрдам режаси ишлаб чиқилаётганини айтган, аммо унинг мазмуни ҳақида тафсилот бермаган. Аввалроқ Оттава Кубада “инсонпарвар инқироз хавфи ортиб бораётгани”дан хавотир билдирган.

БМТ агар энергия эҳтиёжлари қондирилмаса, вазият гуманитар инқирозга айланиши мумкинлигидан огоҳлантирган. Трамп эса Кубага нисбатан босимни давом эттиришини билдириб, орол яқин орада муваффақиятсизликка учрашини иддао қилган.

Эслатиб ўтамиз, аввалроқ Куба Президенти Мигель Диас-Канель аҳолини “ички қаршилик” ва уруш даври руҳида яшашга чақирган эди.