Флик мавсумнинг энг яхши мураббийи деб топилди

“Барселона” жамоасининг бош мураббийи германиялик мутахассис Ханс-Дитер Флик Испания Ла Лигасининг 2025-2026 йилги мавсумида энг яхши мураббий деб топилди. Бу ҳақда Каталония клуби матбуот хизмати хабар берди. 

Флик бошчилигида “Барселона” якунига етган мавсумда мамлакат чемпионлигини қўлга киритди. Каталонияликлар мавсумни 94 очко билан якунлаб, иккинчи ўриндаги “Реал Мадрид”дан 8 очко кўп тўплади.

Жамоа 38 та учрашувда 95 та гол урди ва атиги олтита мағлубиятга учради. Шунингдек, “Барселона” Ла Лига тарихида бир мавсум давомида барча уй учрашувларида ғалаба қозонган илк жамоага айланди.

61 ёшли Флик мазкур совринни кетма-кет иккинчи бор қўлга киритмоқда. Немис мутахассиси “Барселона”ни 2024 йилнинг ёзидан бери бошқариб келмоқда. Жорий йилнинг май ойида клуб у билан тузилган шартнома 2028 йилга қадар узайтирилганини ва келишувни яна бир мавсумга чўзиш имконияти мавжудлигини маълум қилган эди.

Маълумот учун, Флик “Барселона”га қадар “Бавария” жамоасини бошқарган. У мюнхенликлар билан икки марта Германия чемпиони бўлган, шунингдек UEFA Чемпионлар лигаси, UEFA Суперкубоги, Клублар ўртасидаги жаҳон чемпионати, Германия кубоги ва Германия Суперкубоги ғолиблигини ҳам қўлга киритган.