Италиядаги музейдан миллионлаб долларлик асарлар ўғирлаб кетилди

Италиядаги музейдан Ренуар, Сезанн ва Матисс асарлари ўғирланди. Бу ҳақда Бу ҳақда “Deutsche Welle” хабар берди.

Парма яқинидаги Маньяни-Рокка фонди хусусий музейидан машҳур импрессионистларнинг учта асари ўғирлаб кетилди: Пьер Огюст Ренуарнинг “Балиқлар” асари, Поль Сезанннинг қалам ва акварелда чизилган “Олча билан натюрморт” ҳамда Анри Матисснинг “Террасадаги одалиска” акварель асари.

Полиция маълумотларига кўра, ўғрилик бир ҳафта олдин – 22 мартдан 23 мартга ўтар кечаси содир этилган. Ҳозирда тергов ҳаракатлари олиб борилмоқда.

Маълум қилинишича, юзларини беркитиб олган ўғрилар кириш эшигини бузган ва бор-йўғи уч дақиқа ичида санъат дурдоналари билан боғ орқали ғойиб бўлган. Ўғирланган асарларнинг қиймати миллионлаб еврога баҳоланмоқда.

Эслатиб ўтамиз, 2025 йилнинг 19 октябрь куни иш вақти давомида ниқоб кийган жиноятчилар Луврга кириб, императорлик коллекциясига мансуб тўққизта экспонатни, жумладан, Наполеон ва унинг рафиқаси Жозефинага тегишли заргарлик буюмларини ўғирлаган эди. Ўғриликдан етган зарар 88 миллион еврога баҳоланган.

Воқеадан бир ҳафта ўтиб, Луврдан заргарлик буюмларини ўғирлашда гумон қилинаётган тўрт кишидан икки нафари қўлга олинган. Улардан бири Париждаги Руасси – Шарль-де-Голл аэропортида, Жазоирга учадиган самолётга чиқиш пайтида ҳибсга олинган. Иккинчиси эса Сена-Сен-Дени департаментида қўлга олинган.