Си Цзиньпин йил охирига қадар АҚШга келади – Трамп

АҚШ Президенти Дональд Трамп Хитой Халқ Републикаси Раиси Си Цзиньпин жорий йил охирига қадар Оқ уйга ташриф буюришини маълум қилди. Бу ҳақда у 2026 йил, 4 февраль кунги NBC News телеканалига берган интервьюсида айтиб ўтди.

Унинг сўзларига кўра, ташриф АҚШ ва Хитой ўртасидаги муносабатларни яхшилашга қаратилган. Икки давлат савдо масалалари сабабли юзага келган кескинликни юмшатишга интилмоқда.

Маълум қилинишича, Трамп апрель ойида Хитойга ташриф буюриши кутилмоқда. Шундан сўнг  Си Цзиньпин ҳам АҚШга боради. 5 февраль куни Трамп Хитой раҳбари билан видеоконференция орқали суҳбатда савдо, Тайвань масаласи, Россия ва Украина ўртасидаги уруш ҳамда Эрон атрофидаги вазиятни муҳокама қилганини айтганди. 

АҚШ Президенти икки давлат дунёдаги энг йирик иқтисодиётлар эканини таъкидлаб, улар ўртасида яхши муносабатларни сақлаб қолиш муҳимлигини билдирган.

Қайд этиш жоиз, сўнгги йилларда АҚШ Хитой маҳсулотларига божлар жорий қилиш орқали иқтисодий қарамликни камайтиришга ҳаракат қилмоқда. Шунга қарамай, икки давлат иқтисодий жиҳатдан ҳали ҳам бир-бирига боғлиқ бўлиб қолмоқда.

Хитой раҳбари Си Цзиньпин эса АҚШни Тайванга қурол сотишда эҳтиёткор бўлишга чақирган. Шунингдек, Пекин ва Вашингтон ўртасидаги муаммолар тинч йўл билан ҳал қилинишига умид билдирган.

Эслатиб ўтамиз, аввалроқ Хитой Ташқи ишлар вазирлиги вакили Лин Цзянь АҚШда Хитой компаниялари ходимларининг асоссиз ҳибсга олиниши ва сўроқ қилинишига қарши кескин норозилик билдирганди.

Жамшидбек Амиров