550 миллион долларлик фирибгарлик иши бўйича 35 та футбол клуби тинтув қилинмоқда

Аргентина полицияси мамлакатда 550 миллион долларлик фирибгарлик ва коррупция бўйича давом этаётган тергов доирасида миллий футбол федерацияси ва 35 та клуб офисларида рейд ўтказди. Бу ҳақда “Ole” нашри хабар беради.

Манбага кўра, терговчилар ташриф буюрган клублар орасида Аргентина машҳур жамоалари “Банфилд”, “Сан-Лоренсо”, “Расинг” ва “Индепендьенте” клублари офислари ҳам бор. Булардан ташқари яна бир нечта турли футбол клублари ва Аргентина футбол ассоциацияси штаб-квартирасида тинтув ўтказилган.

Хабарларга кўра, терговчилар бир нечта клубларга ҳомийлик қилувчи Sur Finanzas молиявий компанияси билан боғлиқ бухгалтерия маълумотларини қидирмоқда. Компания эса жиноят содир этишда гумон қилиняпти.

2024 йили Аргентина футбол лигаси ва миллий терма жамоанинг расмий ҳомийси бўлган Sur Finanzas солиқ идоралари томонидан Аргентина песосида 550 миллион АҚШ доллари эквивалентига тенг солиқ тўлашдан бўйин товлаганликда айбланмоқда.

Эслатиб ўтамиз, аввалроқ Туркияда Истанбул прокуратураси ўйинларга пул тикиш можароси сабабли 46 кишини ва яна икки клуб президенти ҳам шу сабаб билан ҳибсга олган эди.