АҚШ Колумбия Президентини “қора рўйхат”га киритди

АҚШ Молия вазирлиги Колумбия Президенти Густаво Петрога қарши санкциялар жорий қилди. Бу ҳақда кеча, 24 октябрь куни вазирликнинг расмий сайтида эълон қилинди.

“Президент Петро наркокартелларга гуллаб-яшнашга имкон берди ва уларнинг фаолиятига чек қўйишни рад этди. Бугун Президент Трамп мамлакатимизни ҳимоя қилиш учун қатъий чоралар кўрмоқда ва биз гиёҳванд моддалар контрабандасига йўл қўймаслигимизни аниқ билдирмоқда”, дейди АҚШ Молия вазири Скотт Бессент.

Шунингдек, санкциялар Колумбия Президентининг рафиқаси Вероника Гарсия, унинг катта ўғли Николас Петро ва Ички ишлар вазири Армандо Бенедеттига ҳам татбиқ этилган. Чекловларга кўра, уларнинг АҚШдаги ёки АҚШ фуқаролари назоратидаги мулклари музлатилади, шунингдек, чекловлар 50 фоиз ва ундан ортиқ улушга эга бўлган ташкилотларга ҳам тааллуқли бўлади.

АҚШ Молия вазирлигига кўра, Николас Петро отасининг “сиёсий меросхўри” ҳисобланади. 2023 йилда у Колумбияда пулларни ювиш ва ноқонуний бойиш ишлари бўйича, хусусан, наркосавдогарлардан маблағ олиб, уларни отасининг 2022 йилги сайлов кампаниясига йўналтиргани учун ҳибсга олинган.

2023 йилнинг августида бўлиб ўтган суд мажлисида Николас Петро айбини тан олмаган, бироқ тергов билан ҳамкорлик қилишга рози бўлгани сабабли уй қамоғига ҳукм қилинган. 2025 йилда унга давлат ҳужжатларини сохталаштириш ва давлат харидларига аралашиш билан боғлиқ янги айбловлар қўйилган. Агар унинг айби исботланса, 18 йилгача озодликдан маҳрум қилиниши мумкин.

Қайд этиш жоиз, сўнгги пайтларда АҚШ ва Колумбия ўртасидаги муносабатлар мураккаблашган. Хусусан, Вашингтонда Петро сиёсати ва баёнотлари икки давлат ўртасидаги иттифоқчилик алоқаларига салбий таъсир кўрсатаётгани айтилмоқда. АҚШ Президенти Дональд Трамп бир неча бор Колумбиядан АҚШга гиёҳванд моддалар олиб кетаётган кемалар йўқ қилинганини маълум қилган.

Эслатиб ўтамиз, аввалроқ Трамп АҚШга кетаётган, гиёҳванд моддалар билан тўла улкан сувости кемаси йўқ қилинганини айтганди. Унинг сўзларига кўра, АҚШ махсус хизматлари кемада фентанил ва бошқа наркотиклар бўлганини тасдиқлаган. Петро эса бунга жавобан АҚШ Колумбиянинг ҳудудий суверенитетини бузганини ва наркосавдога алоқаси бўлмаган бир балиқчи ўлдирилганини билдирган.

Шундан сўнг Трамп Петрони “ярамас ва қароқчи” деб атади ва агар Колумбия ҳукумати наркотрафикни ўзи бартараф этмаса, АҚШ куч ишлатишидан огоҳлантирди. 20 октябрь куни Колумбия ўз элчисини Вашингтондан маслаҳатлашувлар учун чақириб олди.