АҚШда 800 минг доллар қийматдаги танга йўлга сочилиб кетди (видео)

Жорий йилнинг 29 апрель куни АҚШнинг Техас штатида танга ортилган юк машинаси ағдарилиб, йўлга 800 минг доллар миқдоридаги майда тангалар сочилиб кетди. Бу ҳақда “The New York Times” хабар берди.

Нашрнинг ёзишича, йўл бўйлаб минглаб тангалар сочилиб кетгач, магистраль йўлнинг бир неча қисми ёпилган. Ҳодиса жойига етиб келганлар вакуумли қурилмалар, белкураклар ва қўллари ёрдамида эндигина зарб этилган тангаларни йиғиб олишга киришган.

“Манзара гўё улкан бир чақа банкаси ёрилиб кетгандек эди. Ҳар томонга сочилган тангалар металл денгизни эслатарди”, дейилади хабарда.

Аслида бу ҳолат жорий йилнинг 29 апрель куни Техас штатининг Форт-Уортдан 80 километр шимолда жойлашган Алворд шаҳридаги 287-магистралда рўй берган йўл-транспорт ҳодисаси оқибатида юзага келган. 18 ғилдиракли юк машинаси ён томонга ағдарилиб кетган.

Техас Жамоат хавфсизлиги департаменти сержанти Хосуе Де Ла Серданинг айтишича, юк машинасида АҚШ зарбхонасида янги зарб этилган саккиз миллионта ўн центлик танга бўлган.

Вайс округи фавқулодда ёрдам хизмати берган маълумотга кўра, машина тонгги 5:15 да ағдарилган. Ҳайдовчи ва йўловчи енгил тан жароҳати олган ва шифохонага олиб борилган. Бошқа ҳеч ким жабрланмаган.

Ёпилган йўлнинг жанубий йўналиши ЙТҲдан 14 соат ўтгач очилган. Бу вақт ичида тозалаш бригадалари оғир вакуумли машиналар ёрдамида асфальтга сочилган тангаларни йиғган. Бошқалар эса белкурак ва қўллари билан йўл четига сочилиб кетган тангаларни йиғиш учун ерни ковлаган.

“Энг кулгилиси, улар тангаларни сув ва бошқа чиқиндиларни сўриб олиш учун ишлатиладиган вакуумли машиналар ёрдамида йиғишганидир”, деди Алворд шаҳри мэри Калеб Кавинесс.

Унинг айтишича, тангаларнинг асосий қисми йиғиб олинган деб ҳисоблаган, қолганлари эса кундузи ёққан тўрт дюйм (тахминан 10 см) ёмғир таъсирида оқиб кетган бўлиши мумкин. Бу ёмғир шаҳарда кичик сув тошқинини ҳам келтириб чиқарган.

Сержант Де Ла Серданинг айтишича, 18 ғилдиракли юк машинаси жанубга ҳаракатланаётган бўлган ва йўлдан чиқиб кетгач, ҳайдовчи рулни ҳаддан ташқари буриб юборган, оқибатда машина ён томонга ағдарилиб кетган.

Юк машинаси Western Distributing Transportation Corp. компаниясига тегишли бўлиб, компания ўз сайтида ҳукуматнинг турли муассасаларига, хусусан, банкларига хавфсизликни талаб қиладиган юкларни етказишини билдирган. Уларнинг машиналари зирҳли бўлиб, ҳар доим қуролланган ҳайдовчи ва қўриқчи билан ҳаракатланади.

Нашр компаниянинг Денвердаги бош офисига қўнғироқ қилганида, у ерда ишловчи ходим изоҳ беришдан бош тортган.

Қайд этилишича, 287-магистраль йўли Далласга олиб боради, бу шаҳарда Федерал захира банкининг бўлими жойлашган. АҚШ Молия вазирлиги изоҳ бермаган бўлса-да, Федерал захира вакиласи бу ҳодиса уларнинг банкига алоқадор эмаслигини маълум қилган.