Жўлонийнинг хотини Латифа ким?

north_east

Йил кашфиёти – Жўлоний

Бу ҳафта Суриянинг ўтиш даври президенти Аҳмад аш-Шара (Муҳаммад ал-Жўлоний номи билан ҳам танилган)нинг рафиқаси Латифа ал-Дурубийнинг омма олдида кўриниш бериши – Маккада умра қилган эр-хотиннинг видеоси интернетда тарқалиши кўпчиликнинг эътиборини тортди.

Ижтимоий тармоқларда кенг тарқалган кадрларда Умра либосларида эр-хотин Масжид ул-Ҳарам ичида ёнма-ён юргани, бирга Каъбага киргани акс этган. Тадбир 3 февраль куни Сурия ўтиш даври президентининг лавозимга киришганидан кейинги Саудия Арабистонига илк хорижий сафари чоғида бўлиб ўтди.

Бу ал-Дурубийнинг ўтган ҳафта АҚШдан келган суриялик аёллар делегацияси билан учрашувидан кейин омма олдида яна пайдо бўлиши эди. Ўшанда аш-Шара уни оммага таништириб, биринчи марта унинг ягона турмуш ўртоғи эканини тасдиқлаганди.

Учрашув иштирокчисининг сўзларига кўра, Сурия ўтиш даври президенти ўз рафиқасини “жуда яхши кўришини” таъкидлаб, бир нечта хотинлари борлиги ҳақидаги миш-мишларни рад этган.

Араб нашрларининг ёзишича, учрашувда қатнашган баъзи иштирокчилар бу лаҳзани йиғилишга ҳазил ва илиқлик туйғусини қўшиш, Сурия диаспорасининг аҳволи ва жамият билан алоқаларни мустаҳкамлашда аёлларнинг ролига бағишланган чиқиш деб таърифлаган.

Ўтмишда у бир неча оммавий тадбирларда қатнашган бўлса-да, у камдан кам суратга тушар эди, бу эса Суриянинг биринчи хонимига қизиқишни оширган.

Қайд этилишича, унинг сўнгги чиқишлари, жумладан, АҚШдан келган суриялик аёллар делегацияси билан учрашуви ва умра зиёратига бориши ал-Дурубийнинг жамоатчилик роли ортиб бораётганидан далолат беради.

АҚШ делегациясининг ўтган ҳафтадаги йиғилиши иштирокчилари Латифани “маданиятли, нафосатли ва нафис аёл” дея таърифлаб, унинг нотиқлиги, вазмин хулқ-атвори ва анъанавий миллий кийинишини мақташди.

Тинчлик ва фаровонлик учун Сурия-Америка коалициясининг аъзоси Абдул Ҳафиз Шараф ОАВга берган интервьюсида Латифа “ҳижоб кийган, лекин [юзини беркитмайдиган] ёш суриялик аёл” эканлигини таъкидлади.

“У Суриядаги ҳижобли аёлларга хос либосда кийинади ва унинг тадбирларда қатнашиши кўпчиликни ҳайратда қолдирди, айниқса мулойим табассумини иштирокчилар илиқ кутиб олади”, дейди у.

Делегация йиғилишида иштирок этган суриялик фаол Рим ал-Базм уни “меҳрибон, босиқ, чиройли, ўзига ишонган ва билимли” деб таърифлади. Унинг қўшимча қилишича, аш-Шара уни “Менинг ягона хотиним ва мен уни жуда яхши кўраман” деган сўзлар билан таништирган.

Ал-Базм, шунингдек, аш-Шара ўз рафиқасини суриялик аёллар делегациясига таништиргани оммавий ахборот воситаларида “итоаткор хотинлар” тасвиридан фарқли ўлароқ, чуқур илдиз отган Сурия анъаналарини акс эттирганини таъкидлади.

“Сурияда яшаган ҳар бир киши аёлни оиласининг устуни эканлигини билади – у режалаштиради, болаларни тарбиялайди, молияни бошқаради ва юқори илмий даражаларга эришиш учун сабр-тоқат қилади. Сурияда эркаклар ўз хотинини тинглайдилар”, деди у.

Латифанинг шахсий ҳаёти ҳақидаги тафсилотлар чекланган бўлса-да, унинг Сурия президенти билан бирга пайдо бўлиши ҳам Сурия ичида, ҳам халқаро миқёсда қизиқиш уйғотди.

Араб нашрларнинг хабар беришича, Латифа ал-Дурубий, Латифа аш-Шара номи билан ҳам танилган, 1984 йилда туғилган. Араб тили ва адабиёти йўналиши бўйича магистр даражасига эга, уч ўғилнинг онаси. Унинг оиласи, ал-Дуруби уруғи, Ҳомсдаги Ал-Қарятайн шаҳридан бўлиб, унинг синглиси Дамашқнинг амалдаги губернатори Маҳер Муҳаммад Марвонга турмушга чиққани айтилади.

Дурубийлар оиласи Сурияда таниқли олимлар ва таниқли шахслар, жумладан, 2009 йилда Жидда шаҳрида вафот этган ҳимслик машҳур Қуръон қориси Шайх Абдул Ғофар ад-Дурубийни етиштирган. 

Эслатиб ўтамиз, кеча, 4 февраль куни Латифа ал-Дурубий Анқарадаги Давлат меҳмон уйида Туркия Президенти Ражаб Тойиб Эрдўғаннинг рафиқаси Эмина Эрдўған билан учрашганди. Биринчи инсонпарварлик ёрдами, ижтимоий бирдамлик, аёлларнинг имкониятларини кенгайтириш ва таълимнинг роли ҳақида фикр алмашган. Шунингдек, Туркия ва Сурия урушдан энг кўп жабрланган аёллар ва болалар учун биргаликда ташлаши мумкин бўлган қадамларни муҳокама қилинган.