Австралияда бурқани “ҳурматсиз” тарзда кийган сенатор лавозимидан четлатилди (видео)

Бугун, 25 ноябрь куни Австралия Сенати ўта ўнгчи сенатор Полин Хансонни парламентга бурқа кийиб киргани учун етти кунга лавозимидан четлатди. Бу ҳақда “Reuters” хабар берди.

Аёл бурқани мезонларга номувофиқ тарзда кийган, унинг бу ҳаракатини парламент аъзолари кескин қоралаган. Хансон бу ишни жамоат жойларида мусулмон кийимини тақиқлашга қаратилган сиёсий кампания доирасида амалга оширган.

Маълум бўлишича, кеча, 24 ноябрь куни Хансон жамоат жойларида бурқа ва бошқа юзни тўсувчи кийимларни тақиқлаш ҳақидаги қонун лойиҳасини муҳокамага қўйишга рухсат ололмагач юқори палатага бурқа кийиб кирган. Унинг бу ҳаракати мусулмон қонунчилар томонидан “ирқчилик” сифатида баҳоланди.

“Сенатор Хансоннинг нафратли ва саёз намойиши бизнинг ижтимоий тузилишимизга зарба берди. Бу Австралияни заифлаштиради. У бутун бир эътиқодни масхара қилди ва ҳақорат қилди. Мен парламентга бундан катта ҳурматсизликни кўрмаганман”, дейди мамлакат Ташқи ишлар вазири, Лейбористлар партияси етакчиси Пенни Вонг.

Квинсленддан сайланган сенатор Хансон биринчи бор 1990 йилларда Осиёдан иммиграция ва бошпана изловчиларга қарши кескин позицияси билан машҳурликка эришган. У йиллар давомида исломий кийимларга қарши чиқишларни олиб борган.

Бу Хансоннинг парламентга иккинчи марта бурқа кийиб кириши бўлиб, у 2017 йилда ҳам бутун мамлакат бўйлаб бурқани тақиқлашга чақирган эди.

Хансон бурқа бўйича қарашларини ўзгартирмаслигини ва парламентда кийим чегараси мавжуд эмаслигини таъкидлади.

Эслатиб ўтамиз, олдинроқ Португалия парламенти жамоат жойларида юзни ёпиб турувчи кийим, жумладан, бурқа ва ниқоб кийишни тақиқловчи қонун лойиҳасини маъқуллагани ҳақида хабар берилганди. Ҳужжатда “жинсий ёки диний сабабларга кўра” ниқоб кийиш ҳақида сўз боради. Қоидабузарликлар учун жарима миқдори 200 евродан 4000 еврогача бўлади. Шунингдек, диний либосларни мажбуран кийиш учун ҳам уч йилгача қамоқ жазоси назарда тутилган.

Комила Қобилова