Дунёнинг энг бой давлатлари рейтинги эълон қилинди

Бугунги кунда дунёнинг энг юқори даромадга эга бўлган ўнта давлатидан еттитаси Европада жойлашган. Бу ҳақдаги рейтинг “Visual Capitalist” томонидан эълон қилинди.

Маълум қилинишича, ушбу давлатларни бирлаштирувчи асосий омиллар аҳолининг кам сонли бўлиши ва ривожланган ижтимоий таъминот тизимларидир.

Инфографикада Халқаро валюта жамғармасининг 2025 йил учун янгиланган маълумотлари асосида аҳоли жон бошига энг юқори ЯИМга эга давлатлар кўрсатилган.

Унга кўра, биринчи ўринда – Лихтенштейн. Бу мамлакатда аҳоли жон бошига ЯИМ 231 минг 713 долларни ташкил этади. Бундай юқори кўрсаткичнинг сабаби – мамлакатда ишловчиларнинг тахминан 60 фоизи чет элдан келиб ишлаши. Бу эса статистика бўйича ўртача даромадни сунъий равишда оширади. Шунга ўхшаш вазият иккинчи ўринда турган Люксембургда ҳам мавжуд.

Учинчи ўринда Ирландия – 129 132 долларлик кўрсаткич билан. Google’дан тортиб Meta’гача бўлган кўплаб технологик гигантларнинг Европа штаб-квартиралари Ирландияда жойлашгани, мамлакатнинг қулай солиқ сиёсати бу кўрсаткичнинг ўсишига хизмат қилган.

Кейинги ўринларда Швейцария, Исландия ва Сингапур жойлашган. Бу давлатларда даромад даражаси ҳақиқий аҳолининг юқори фаровонлиги билан боғлиқ бўлиб, солиқ чегирмалари ёки катта миқдордаги чет эллик ишчилар оқимига боғлиқ эмас. Айниқса Сингапур эътиборга лойиқ. 1980 йилдан буён ўртача даромад 19 баравар ошган, чунки шаҳар-давлат дунёнинг йирик молия ва савдо марказларидан бирига айланган.

Таъкидлаб ўтиш жоизки, ушбу рўйхатдан Ўзбекистон ҳам, Марказий Осиё давлатлари ҳам жой ололмаган. 

Эслатиб ўтамиз, аввалроқ дунёдаги энг бой одам ўзгаргани – Tesla ва SpaceX асосчиси Илон Маскнинг ўрнини Oracle асосчиси Ларри Эллисон эгаллагани ҳақида хабар берилганди.