Эрдўғаннинг ўғли унинг ўрнини эгаллаши мумкин – “Bloomberg”

Туркия Президенти Ражаб Тойиб Эрдўған 20 йилдан ортиқ вақт давомида ҳукмронлик қилган мамлакат сиёсатида янги давр бошланиши белгилари кўринмоқда, унинг ўрнини ўғли Билол Эрдўған эгаллаши мумкин. Бу ҳақда ўз манбаларига таяниб, “Bloomberg” хабар берди. 

Хабарда Эрдўғаннинг саломатлиги ёки кейинги даврга оид муҳокамалар партия ичида одатда ёпиқ муҳитда сақланиб келинишига қарамай, 44 ёшли Билол Эрдўғаннинг исми “эшик ортида” кўпроқ тилга олинаётгани айтилган.

Шунингдек, нашр Билол Эрдўғаннинг отаси билан бирга Саудия Арабистони шаҳзодаси Муҳаммад бин Салмон билан учрашувдан тортиб Покистон, Малайзия ва Қатар сафарларигача бўлган бир қатор ташқи сафарларда иштирок этгани, унинг профилининг кўтарилаётганидан далолат сифатида келтирган. Давлат ахборот агентликларида Билол Эрдўғаннинг фаолиятига оид хабарлар тез-тез эълон қилинаётганига эътибор қаратилган ва бу ҳолат унинг кўринишини (юзини) кўпроқ кўрсатиш учун махсус режа билан қилинган бўлиши мумкинлиги айтилган.

“Bloomberg” билан суҳбатлашган ва исмини сир сақлашни сўраган манбалар Билол Эрдўғаннинг сиёсатга кириши ва эҳтимолий етакчилик роли Анқарадаги Адолат ва тараққиёт партияси (АТП) ортида муҳокама қилинаётганини айтишган. Манбалар Гарвард университетида жамоат сиёсати бўйича магистратура даражасига эга Билол Эрдўған “расмий бўлмаган сиёсий етакчилик таълими” олганини ва унга содиқ жамоа тузаётганини иддао қилишган. Қолаверса, партия ва ҳукумат ичидаги юқори мартабали расмийларни танлашда ҳам у таъсир кўрсатаётгани айтилган.

“Refleks Data & Research”нинг яқинда “Ражаб Тойиб Эрдўғандан кейин АТП бош котиби сифатида кимни кўришни хоҳлайсиз?” номли сўровнома ўтказган.  
 
2386 респондент қатнашган ушбу сўровномада Туркия Ташқи ишлар вазири Ҳоқон Фидан 33,4 фоиз билан биринчи ўринни эгаллаган. Иккинчи ўринда АТП депутати ва собиқ ички ишлар вазири Сулаймон Сойлу 32,5 фоиз билан жой олган. Билол Эрдўған 14,2 фоиз қўллаб-қувватланган, Президент Эрдўғаннинг куёви ва “BAYKAR” турк мудофаа саноати компанияси раиси Селчук Байроқдор 12,9 фоиз, парламент спикери Нўмон Куртулмуш эса 7 фоиз овоз тўплаган. Бу натижа меросхўрлик ҳақидаги мунозаралар кучаяётган бўлсада, сайловчилар танлови билан ўртада фарқ борлигини кўрсатади.

Эъзоза Олимова