Эрон Ҳормуз бўғозини очмаяпти

Эрон ҳалигача Ҳормуз бўғозини тўлиқ оча олмаяпти, чунки у ерга ўрнатилган барча денгиз миналарини аниқлай олмаяпти ва уларни тезкор зарарсизлантириш имкониятига эга эмас. Бу ҳақда “The New York Times” хабар берди.

Нашрнинг Америка расмийларига таяниб ёзилишича, бу ҳолат АҚШ ва Эрон делегациялари ўртасида Исломободда ўтказилиши режалаштирилган музокараларни ҳам қийинлаштириши мумкин.

Маълум қилинишича, ўтган ойда Эрон АҚШ ва Исроил билан можаро бошланганидан сўнг стратегик бўғозни кичик кемалар орқали миналаштирган. Миналар, дрон ва ракета ҳужумлари таҳдиди билан бирга, нефть танкерлари ва бошқа кемалар ҳаракатини деярли тўхтатиб қўйган, бу эса энергия нархларининг кескин ошишига ва Эронга ҳам ҳарбий, ҳам дипломатик босим воситасини берган.

Шу билан бирга, Теҳрон тўлов қилишга рози бўлган кемалар учун ўтишни қисман очиқ қолдирган. Эрон ҳукумати томонидан миналар хавфи ҳақида огоҳлантиришлар тарқатилган, оммавий ахборот воситалари эса хавфсиз йўналишлар хариталарини эълон қилган.

Бироқ америкалик манбаларнинг таъкидлашича, бу йўналишлар ишончли эмас, чунки миналаштириш тартибсиз амалга оширилган. Эрон барча миналар жойлашувини қайд этмаган бўлиши мумкин, айримлари эса сувда сузиб юрадиган қилиб ўрнатилган.

Нашрнинг қайд этишича, денгиз миналарини зарарсизлантириш уларни ўрнатишга нисбатан анча мураккаб. АҚШда ҳам кучли миналарни тозалаш имкониятлари чекланган бўлиб, асосан махсус тралларга эга кемаларга таянади. Эроннинг ўзи ҳам ўз миналарини тезда йўқ қилиш имкониятига эга эмас.

Эслатиб ўтамиз, Эрон делегацияси АҚШ билан музокараларда иштирок этиш учун кеча, 10 апрель куни кечқурун Исломободга етиб борганди. Делегацияга Эрон Ташқи ишлар вазири Аббос Ароқчи ҳамда парламент спикери Муҳаммад Бағир Ғолибоф бошчилик қилмоқда.