Эрон бойитилган уранни АҚШга бермайди – Бағоий

Эрон ўзининг бойитилган уранини АҚШга топшириш масаласини ҳеч қачон муҳокама қилмаган. Бу ҳақда кеча, 17 апрель куни мамлакат Ташқи ишлар вазирлиги расмий вакили Исмоил Бағоий телевидение орқали қилган чиқишида сўз очди.

У бундай вариант кўриб чиқилмаётганини таъкидлаган. 

“Бойитилган уран биз учун Эрон тупроғи каби муқаддасдир ва у ҳеч қаерга, ҳеч қандай шароитда топширилмайди”, дейди Бағоий.

Шу тариқа, у АҚШ Президенти Дональд Трампнинг Эрон бомбардимонлар пайтида зарар кўрган Исфаҳон, Натанз ва Фордо объектларидаги бойитилган уранни америкаликларга топширишга рози бўлгани ҳақидаги иддаосини рад этди. Оқ уй раҳбари материалларни вайроналар остидан экскаваторлар билан қазиб олиб, АҚШга олиб чиқиб кетишини, бунинг эвазига эса Теҳрон “ҳеч қандай пул олмаслигини” айтган эди.

Бағоий, шунингдек, ОАВда Эроннинг уранни бойитишни тўхтатишга тайёрлиги ҳақидаги хабарлар музокарачиларга нисбатан “медиа-босимнинг бир қисми” эканини, бироқ Теҳрон бу масалада ўз тамойилларига амал қилишда давом этишини таъкидлаган.

Апрель ойи бошида АҚШ Эронга урушни тугатиш бўйича 15 банддан иборат режани тақдим этганди. У Натанз, Исфаҳон ва Фордодаги ядровий объектларни демонтаж қилишни, шунингдек, 60 фоизгача бойитилган тахминан 450 кг уранни Халқаро атом энергияси агентлигига топширишни ўз ичига олган. Худди шу таклифлар 12 апрель куни Покистонда икки давлат ўртасидаги тўғридан тўғри музокараларда ҳам муҳокама қилинган.

Америка делегациясига раҳбарлик қилган вице-президент Жей Ди Вэнс Штатлар Эронда қолган уранни қўлга киритиш ниятида эканини қайд этган. “The New York Times” манбаларига кўра, Вашингтон уранни бойитишга 20 йиллик мораторий талаб қилган, бироқ Теҳрон фақат беш йиллик чекловга рози бўлган. Эроннинг бошқа шартлари санкцияларни бекор қилиш ва уруш етказган зарар учун товон тўлашдан иборат эди.

Ҳозирда икки давлат ўртасида 22 апрелгача давом этадиган сулҳ амал қилмоқда. Янги раунд музокаралари санаси ҳозирча белгиланмаган. “The Wall Street Journal” нашрининг АҚШ маъмуриятидаги манбаларига кўра, у 20 апрель куни Покистонда бўлиб ўтиши мумкин. Шу билан бирга, Трамп агар сулҳ тугагунга қадар томонлар келишувга эришмаса, Эронни “яна бомбардимон қилишни бошлашига тўғри келиши” ҳақида огоҳлантирди.