FIFA Панама футбол федерацияси президентини жазолади

FIFA Этика қўмитаси Панама футбол федерацияси (FPF) президенти Мануэль Ариасни олти ойга футбол билан бўғлиқ ҳар қандай фаолиятдан четлатди ва 20 минг швейцария франки миқдорида жаримага тортди. Бунга унинг аввал қўйилган санкцияга тўлиқ риоя қилмагани сабаб бўлди.

“Панама футбол федерацияси президенти Мануэль Ариас  FIFA Тартиб-интизом кодексининг 21-моддасини бузганликда айбдор деб топилди ва олти ой давомида футбол билан боғлиқ ҳар қандай фаолиятдан четлаштирилди”, дейилади FIFA баёнотида.

Қайд этилишича, ушбу жазо Панама футбол федерацияси фаолиятига тўлиқ тааллуқли эмас, чеклов фақат ижроия ҳокимияти ваколатларига татбиқ этилади. Ариасга бундан аввал ҳам жазо қўлланган. У 2025 йил 14 июлда Панама аёллар терма жамоаси ўйинчисига нисбатан номақбул сўз ишлатгани учун санкция олган эди.

Янги санкция ортидан FPF ичида вақтинчалик раҳбарлик масаласи ҳам аниқ бўлди. Федерация биринчи вице-президенти Фернандо Арсе Марказий Америкадаги футбол бошқаруви учун масъул вакил этиб тайинланди.

“Панама футбол федерацияси жаноб Мануэль Ариасга 2025 йил 14 январда қўйилган санкцияга тўлиқ риоя қилмагани сабабли янги жазо қўлланганидан хабардор қилинди. Сўнгги йилларда президент Ариас бошчилигида биз қисқа, ўрта ва узоқ муддатли стратегияларни ишлаб чиқдик ҳамда ички бошқарув жараёнларини шаффоф ва самарали қилиш устида ишладик. Белгиланган спорт ва институционал мақсадлар сари ҳаракат қилишда давом этамиз”, дейилади FPF баёнотида.

Эслатиб ўтамиз, аввалроқ Африка футбол конфедерацияси (CAF) Жанубий Африканинг “Орландо Пайретс” клубига Конгонинг “Сент-Элуа Лупопо” жамоасининг кийиниш хонасига зарарли модда сепганлик учун 25 минг АҚШ доллари миқдорида жарима тайинлаган эди.