FIFA ЖЧга қуръа ташлаш тартибини эълон қилди

FIFA 2026 йилги Жаҳон чемпионати қуръа ташлаш тартибини эълон қилди. Унда энг юқори рейтингга эга тўрт жамоа Испания, Аргентина, Франция ва Англия ярим финалга бориш йўлларини аниқлаш мақсадида “рақобат мувозанатини таъминлаш” чора-тадбирлари билан турли томонларга жойлаштирилди.

Бу тартиб, агар ушбу жамоалар ўз гуруҳларида ғалаба қозонса, Испания ва Аргентина тўқнаш келмаслиги, шунингдек, Англия ва Франция финалдан олдин ўзаро ўйнамаслигини кафолатлайди. FIFA баёнотига кўра, йўллар тасодифий тарзда чизилади, яъни Испания-Франция ва Аргентина-Англия жуфтликлари аниқ белгиланган эмас.

Гуруҳ босқичи 12 та гуруҳдан иборат бўлиб, ҳар бир гуруҳда тўрт жамоа ўйнайди. Қуръа тартибига кўра, учта мезбон давлат АҚШ, Мексика ва Канада биринчи саватчада жойлашади. Кейин FIFA рейтинги бўйича қолган жамоалар ва плей-офф йўллари аниқланади. Ушбу тизим дунёнинг энг кучли жамоаларини гуруҳ босқичида бир-бирига тўқнаш келмаслигини таъминлайди ва энг юқори рейтингдаги жамоаларни ярим финалгача боришини таъминлайди.

FIFA баёнотида таъкидланишича, рақобат мувозанатини сақлаш мақсадида ярим финалга иккита алоҳида йўл белгиланди. Агар жамоалар ўз гуруҳларида ғалаба қозонса, энг юқори ўринни эгаллаган икки жамоа финал олдидан тўқнаш келмайди.

Шунингдек, қоидага кўра, гуруҳ босқичида бир хил конфедерация жамоалари бир гуруҳга тушмаслиги керак, аммо UEFA 16 та жамоа билан иштирок этиши туфайли Европа жамоалари орасида баъзи истиснолар бўлиши мумкин.

Қуръа ташлашдан бир кун ўтиб, жорий йилнинг 6 декабрь куни FIFA ўйинлар тақвимини эълон қилади ва ўйинларнинг жойи ҳамда бошланиш вақтларини белгилайди. Ташкилот маълумотларига кўра, бу жараён барча жамоалар учун энг қулай шароит яратиш ва мухлисларнинг ўз жамоаларини турли вақт зоналарида жонли томоша қилиш имконини таъминлаш мақсадида амалга оширилади.

Эслатиб ўтамиз, аввалроқ Ўзбекистон миллий терма жамоаси Жаҳон чемпионати учун қуръада 3-саватчадан ўрин олиши ҳақида хабар берилган эди.