Германияда мияни компьютерга улаш операцияси ўтказилди

Германиянинг Мюнхен техника университети клиникаси шифокорлари бўйин пастидан фалаж бўлган 25 ёшли беморнинг миясига электрон узаткич ўрнатди. Бу ҳақда кеча, 17 октябрь куни “Deutsche Welle” хабар берди.  

Қайд этилишича, бемор миясига жами 256 та микроэлектрод уланган. Улар нейрон сигналларни қайд этади. Сунъий интеллект асосидаги тизим бу сигналлар ва беморнинг қўл-ҳаракатлари ўртасидаги боғлиқликни ўрганиб, уларни декодлайди. Дастлабки босқичда бемор фақат фикр кучи орқали компьютер мониторидаги курсорни ҳаракатлантира олади ва сичқонча тугмасини “босиш” сигналини бера олиши кутилмоқда. Кейинги босқичда эса у смартфон ҳамда робот қўлни бошқаришни ўрганади.

Операция 5 соат давом этган ва бу орқа мия фалажи билан оғриган беморга Европада ўтказилган биринчи шундай жарроҳлик амалиёти бўлган. 2022 йилда шу клиника инсультдан сўнг нутқ бузилишидан азият чеккан беморга шунга ўхшаш имплант ўрнатган.

Мюнхенлик шифокорларнинг айтишича, бу технология соҳасида уларнинг асосий рақиби – АҚШ. 

Эслатиб ўтамиз, 2024 йилнинг январь ойида Илон Маскнинг Neuralink компанияси биринчи марта инсон миясига нейрочип ўрнатган ва унинг ёрдамида одамлар ўз фикрлари орқали гаджетларни бошқара олиш имконига эга бўлганди.