“Гренландиядан қўлингни торт”. Данияда Трампга қарши намойишлар ўтказилмоқда (видео)

north_east

Гренландия келажаги кимнинг қўлида?

 Бугун 17 январь куни Даниянинг йирик шаҳарлари ва Гренландия автоном ҳудудида минглаб одамлар АҚШ президенти Дональд Трампнинг оролни қўшиб олиш ҳақидаги баёнотларига қарши норозилик намойишига чиқди. Бу ҳақда DW хабар берди.

Намойишчилар Копенгаген шаҳар ҳокимят маъмурий биноси  (ратушаси) ёнида тўпланиб Гренландиянинг қизил-оқ рангли байроқларини кўтарган ҳолда “Гренландия сотилмайди!”, “Гренландиядан қўлингни торт” деб бақиришган. Копенгаген мэри Сиссе Мари Веллинг намойишда сўзга чиқиб, орол товар эмаслигини ва унинг тақдири фақат гренландияликларнинг хоҳишига боғлиқ эканини қатъий таъкидлаган.

“Биз Гренландиянинг ўз тақдирини ўзи белгилаш ҳуқуқи ва унинг халқига нисбатан ҳурмат талаб қиламиз. Бу шунчаки Гренландия учун кураш эмас, балки бутун дунё тинчлиги ва адолати йўлидаги курашдир”, деган “Гренландиядан қўлингни торт” фуқаролик ташаббуси асосчиси Поуль Йоханнессен ўз интервьюсида.

Маълумотларга кўра,  Копенгагендаги намойишлар бошланиши арафасида АҚШ Конгрессининг бир гуруҳ аъзолари президент Дональд Трампнинг режасига кескин қарши эканини билдирган. Хусусан, Делавэр штатидан сайланган сенатор-демократ Крис Кунс Дания пойтахтида ўтказилган матбуот анжуманида Гренландия Данияга тегишли эканини таъкидлаб, оролнинг ҳуқуқий мақоми бўйича баҳсларга чек қўйиш кераклигини таъкидлаган.  Сенаторнинг бу баёноти Вашингтоннинг сиёсий доиралари орасида Гренландия масаласида якдиллик йўқлигини ва Конгресс Даниянинг суверенитетини қўллаб-қувватлашини англатади.

Эслатиб ўтамиз, аввалроқ НАТОнинг учта давлати – Германия, Швеция ва Норвегия Гренландияга қўшин юборгани ҳақида хабар берилган эди. 

Шаҳноза Қурбонбоева