ИИБ ходимлари ногиронлиги бўлган аёлни аёвсиз калтаклади(ми?) (видео)

Тошкент шаҳар Мирзо Улуғбек туманида икки нафар маҳалла инспектори бир аёлни тепиб, калтаклади. Бу ҳақда жабрланувчи аёлнинг отаси QALAMPIR.UZ’га маълум қилди.

Мурожаатчининг сўзларига кўра, жабрланувчи аёл 1995 йилда туғилган, олий маълумотли педагог, оилали (шаръий никоҳ асосида) ва бир нафар фарзанди бор. Аёл турмуш ўртоғига тегишли бўлган уйда – Мирзо Улуғбек тумани, ТТЗ 1 маҳалласи, Буюк Ипак йўли, 5 тор кўчасидаги хонадонда эри билан биргаликда яшаган. Аёл ва унинг фарзанди ушбу хонадонда яшаш учун расмий рўйхатдан ўтган.

Жабрланувчи ўтган йили августда юрак соҳасида жарроҳлик амалиётини ўтказган. Аёл касал бўлгач, эри билан ўрталарида тез-тез ўзаро жанжал чиқиб турган. Шунга қарамай, 2025 йил декабрь ойига қадар улар бирга яшаган. Ой бошида аёл даволаниш учун 10 кун муддатга шифохонага ётқизилган. Шу вақт ичида  турмуш ўртоғи аёлини огоҳлантирмай, яшаб турган уйини бошқа бир оилага ижарага бериб юборган.

10 декабрь куни аёл ва унинг синглиси яшаш хонадонига борганида, эшикнинг қулф-калити ўзгартирилган бўлган. Шундан сўнг, жабрланувчи аёл участка нозирларини чақирган. Инспекторлар аёлга бу хонадонда бошқа оила ижара асосида яшаётганини айтиб, унга кетишини буюрган. 

Мурожаатчининг айтишича, аёлнинг боришга бошқа жойи бўлмаган. Шунингдек, у оиласини сақлаб қолиш мақсадида ушбу хонадонга кириши кераклигини ва уйдан чиқмаслигини билдирган. Шундан сўнг, янги ижарачилар, аёл ва ИИБ ходимлари ўртасида жанжал келиб чиққан. 

Отанинг қўшимча қилишича, ИИБ ходимлари аёлни мазкур уйга киритмаслик учун даҳлиз чироғини атайлаб ўчириб, (тасвирда кўринмаслик учун) аёлнинг ожизлиги ва касаллигидан фойдаланиб, уни қоронғида уриб, дўппослаган. Шундан сўнг, аёл ҳушини йўқотган.

Жабрланувчилар бир неча бор юқори турувчи органларга мурожаат қилган. Видеотасвирлар ашёвий далил сифатида тегишли органларга тақдим этилган. Бироқ аёлнинг ўзини улар “шантаж” қилганликда айблаган ва мазкур иш ёпиб юборилган.

Ҳолат ижтимоий тармоқларда тарқалгач, Тошкент шаҳар ИИББ расмий маълумот берди. Унда 1995 йилда туғилган аёл ногирон эмас дея келтирилган. Чунки, жанжал 12 декабрь куни содир бўлган. Аёл II гуруҳ ногирони эканини тасдиқловчи ҳужжат эса, 30 декабрь куни берилган. 

Бироқ, аёлга ногиронлик бўйича расмий ҳужжат август ойида унинг юрак соҳасида ўтказган операцияси сабаб берилган. Яъни, жанжал вақтида ҳам у хаста бўлган.

Бундан ташқари, расмий изоҳга кўра, воқеа жойига ҳудудий профилактика инспекторлари келиб, юзага келган жанжални тўхтатишга ҳаракат қилгани билдирилган. Бироқ, таҳририят томонидан тақдим этилган видеотасвирлардаги ИИБ ходимларининг жисмоний хатти-ҳаракатларига, хусусан,  нимани ёки кимни тепкилаганига изоҳ берилмаган.