Индонезияда Президент мушугига қўриқчи тайинланди

Индонезия Президенти Прабово Субианто мушуги учун махсус қўриқчилар тайинлагани оқибатида мамлакатда можаро келиб чиқди. Бу ҳақда “Malay Mail” хабар берди.

Қайд этилишича, Давлат котиби ўринбосари Жури Ардианторо Президентнинг 9 йил олдин кўчадан топиб олган Бобби лақабли мушуги расмий хавфсизлик протоколига киритилиши ҳақида маълум қилган. Бу қарор жамоатчилик танқидига сабаб бўлган.

“Бобби кимники? Давлат уни қўриқлай оладими? Албатта, ҳа. Нега бу норозиликка сабаб бўлиши керак?”, деган Ардианторо.

Боббининг Жакартада ўтказилган “Мушуксеварлар мулоқоти куни” фестивалига полиция кузатуви остида олиб кетилаётгани акс этган видео ижтимоий тармоқларда кескин норозиликларга учраган.

“Мушукка қўриқчи сифатида ҳамроҳ бўлганинг учун маош оласанми? Миллат сифатида шунчалик йўлдан адашганмизми?” дея изоҳ ёзган бир тармоқ фойдаланувчиси.

Шунингдек, Индонезияда давлат бюджетидан минтақавий ҳайвонлар фестиваллари учун катта маблағ сарфланиши ҳам жамоатчилик танқидига учраган.

Дилшод Ҳакимов