Исроилнинг ракеталари тугамоқда – ОАВ

Исроилда баллистик ракеталарни ушлаб қолиш воситалари жиддий даражада камайиб кетган, база бўш қолган. Бу ҳақда “Semafor” нашри хабар берди.

Нашр маълумотларига кўра, Исроил Эрон билан ҳозирги урушга киришган пайтдаёқ ракеталарни ушлаб қолувчи тизимлар захираси чекланган бўлган. Бу захиралар ўтган йили икки давлат ўртасидаги 12 кунлик тўқнашув давомида катта миқдорда сарфлаб юборилган.

Америка расмийларидан бирига кўра, АҚШ бу муаммодан бир неча ойдан бери хабардор бўлган. Унинг таъкидлашича, Вашингтон бу ҳолатни олдиндан кутган ва башорат қилган.

Шу билан бирга, нашр суҳбатдоши АҚШда бундай ракеталар танқислиги кузатилмаётганини билдирган.

“Bloomberg” агентлиги ҳам АҚШ ва Исроилда ракеталарни ушлаб қолиш учун мўлжалланган зенит ракеталари захираси тез тугаб қолиши мумкинлиги ҳақида ёзган. Манбаларга кўра, бу арсенал урушнинг дастлабки кунларидаёқ бир неча кун ичида тугаб қолиши эҳтимоли бор.
Шунингдек, “The New York Times” газетаси Эрон арзон дронларни оммавий равишда учириш тактикасидан фойдаланаётганини ёзган. Бу орқали Теҳрон АҚШ ва унинг иттифоқчиларини қимматбаҳо ҳаво ҳужумидан мудофаа ракеталарини сарфлашга мажбур қилаётгани таъкидланган.

Газетага кўра, бу тактика узоқ давом этадиган можаро шароитида минтақадаги ҳаво ҳужумидан мудофаа тизимларининг барқарорлигига жиддий савол туғдириши мумкин.

Эслатиб ўтамиз, аввалроқ АҚШ Президенти Дональд Трамп Эроннинг ҳарбий салоҳияти тўлиқ йўқ қилинганини маълум қилганди, бироқ мамлакат ҳали ҳам кемалар қатновига нуқтали зарбалар беришга қодирлигидан огоҳлантирганди.