Истанбулда ўлдирилган аёлнинг жасади бўлаклари топилди. У Ўзбекистонга қайтарилади (видео)

Аввалроқ, Туркиянинг Истанбул шаҳрида ўзбекистонлик аёл ўлдирилиб, жасади бошсиз ҳолда чиқинди контейнерига ташлаб кетилгани ҳақида хабар берилган эди. Маълум бўлишича, аёлнинг жасад бўлаклари топилган ва уни Ўзбекистонга қайтариш чоралари кўрилмоқда. Бу ҳақда айни пайтда Истанбулда бўлиб турган QALAMPIR.UZ журналисти маълум қилди.

Ўзбекистоннинг Истанбул шаҳридаги бош консули Шерзод Абдуназаровнинг айтишича, ҳозирда тергов ишлари давом этмоқда.

“Биз бу ҳолатни эшитимиз биланоқ, кеча соат олтида суд-тиббий экспертизасига бордик. Ҳодиса содир бўлган жойдаги полиция биносига яна бир ходимимизни жўнатдик. У ерда тергов жараёни билан, ходимлари билан бевосита мулоқот қилиб, ўрганиш ишларини олиб бордик. Кўплаб оммавий ахборот воситалари ҳолатни билмасдан, уларнинг ахлоқий жиҳатларини ёки бошқа турли хил маълумотларни тарқатишни бошлашди. Бу ҳолатлар аслида ўз тасдиғига эга эмас”, дейди у.

Шерзод Абдуназаровнинг билдиришича, марҳума 7 йилдан бери Истанбулда истиқомат қилиб келган, қонуний ишлаган ва икки нафар фарзанди бўлган.

“Икки нафар фарзанди бор. Бошида полиция ҳам хавфсизлиги нуқтаи назаридан бизга маълумотларини беришмади. Биз ўзимиз уларни бир амаллаб қариндош-уруғлари орқали телефонларини топиб, вояга етмаганлар билан ишлаш полиция бўлимларидагилар билан алоқа ўрнатиб, уларнинг хавфсизлигини таъминлаш бўйича ишларини амалга оширмоқдамиз. Улар билан доимий равишда алоқадамиз. Ўзбекистондаги қариндошлари билан уларга маълумот бериб бормоқдамиз”, дейди консул.

Унинг айтишича, болалар ҳозирда қариндошларининг қўлида.

“Улар оила қўлида. Яқинлари хабардор. Дилдора Ҳакимованинг онаси ва укаларига хабар бердик. У Тошкент шаҳрида доимий рўйхатда туради. Истанбулда қонуний асосда вақтинча яшаган”, дейди Шерзод Абдуназаров.

Унга кўра, жасад Ўзбекистон ҳукумати ҳисобидан ортга қайтарилади. Ҳозирда жасаднинг ҳамма бўлаклари топилиб, бирлаштирилган.

Маҳаллий нашрларнинг ёзишича, жорий йилнинг 24 январь куни кечаси Истанбулнинг Шишли тумани Дуатепе маҳалласида даҳшатли воқеа содир бўлди. Маҳаллий вақт билан соат тахминан 19:40 ларда ҳудудда чиқинди йиғиш ва қоғоз териш билан шуғулланиб юрадиган Окан исмли шахс Куюлубоғ кўчаси, 25-уй олдидаги ахлат контейнерини ковлар экан, чойшаб ва пакетларга ўралган жасадни пайқаб қолган. У ҳолат ҳақида хабар бериш учун полиция бўлимига бориб, кўрганларини айтиб берган.

Оканнинг айтишича, у ҳодиса вақтида контейнерни кавлаётганида қора пакетни кўрган, пакетни йиртганида қон ва инсон жасадига кўзи тушган ҳамда жасад ҳали иссиқ эканини сезган. Шундан сўнг Ферикўй полиция бўлимига бориб ҳолатни маълум қилган, полиция ходимлари ҳам воқеа жойига келиб, жасадни контейнер ичида кўрган. У полиция билан бирга яна ҳодиса жойига қайтган. Дастлабки кўздан кечиришда жасаднинг боши кесилган бўлиб, аёл кишига тегишли экани тахмин қилинган.

Қотиллик бўлими детективлари олиб борган текширувлар давомида яна бир гувоҳнинг кўрсатмаси олинган. Гувоҳнинг айтишича, соат 19:00 лар атрофида у онасини кўриш учун мазкур кўчага келган ва шу пайтда ахлат контейнери олдида соқолли икки эркакнинг чамадон билан кутиб турганини кўрган.

Шунингдек, гумонланувчиларнинг жасадни чамадон ичида олиб келиб ташлаган лаҳзалари акс этган кузатув камераси тасвирлари ҳам аниқланган. Кадрларида икки шахс қўлларида чамадон билан контейнер ёнига келаётгани кўринади.

Детективлар ҳодиса жойида олиб борган ишлар чоғида жасаднинг танаси солинган контейнерда бош ва оёқлар йўқлигини аниқлаган. Жасад солинган деб тахмин қилинган чамадон эса бир неча кўча наридаги Бозкурт кўчасидаги бошқа ахлат жойидан топилган.

Ҳодиса жойи бузилмаслиги учун жасад контейнердан чиқарилмаган, шу сабабли тананинг тўлиқ ҳолати жойида батафсил баҳоланмаган. Ҳудуд хавфсизлик ҳалқасига олиниб, Қотиллик бўлими ва Ҳодиса жойини кўздан кечириш бўлимига хабар берилган ва кенг қамровли тергов бошланган.

Жамоат хавфсизлиги бўлими ходимлари томонидан ўтказилган текширувлар натижасида бармоқ изи орқали аёлнинг шахси аниқланган. У Ўзбекистон фуқароси Дурдона Ҳакимова экани маълум бўлган. Жасад кўздан кечирилганда унинг устида қора рангли куртка, қора рангли узун енгли свитшот, қора ички кийим бўлгани ва оқ чойшабга ўралган ҳолатда экани аниқланган. Марҳуманинг шахси бармоқ изи орқали тасдиқланган.

Камера ёзувлари ва гувоҳларнинг кўрсатмаларига кўра, ҳодиса жойидаги ахлат контейнерига қорамтир кийимдаги, соқолли икки эркак оч рангли чамадон билан келгани, кейин яна чамадон билан пиёда кўчадан чиқиб кетгани, гумонланувчилар чамадонни ҳодиса жойига яқин бўлган Бозкурт кўчаси томон ташлаб кетгани аниқланган.

Истанбул полицияси Истанбул аэропортида Грузияга қочмоқчи бўлган пайтда икки нафар қотилликда гумонланувчини қўлга олган. Уларнинг иккаласи ҳам Ўзбекистон фуқаролари экани маълум бўлган. Разведка бўлими ва Қотиллик бўлими томонидан бир неча соат ичида ушланган гумонланувчилардан бири қотилликни бевосита содир этган, иккинчиси эса ёрдам бергани аниқланган.

Қотилликни содир этган Д.Т. кўрсатма берган.

“Дурдона Ҳакимова билан воқеа куни танишганмиз, орамизда муносабат бошланган. Жангаллашиб қолдик ва мен уни пичоқ билан ўлдирдим. Кейин дўстим билан бирга жасадни бўлакларга ажратдик. Жасад қисмларини алоҳида пакетлаб, чамадон ичига жойладик. Сўнг тижорат таксиси билан Шишли туманига келдик ва жасад ҳамда унинг қисмларини турли ахлат контейнерларига ташлаб юбордик”, дейди у.

Гумонланувчиларнинг аэропортдан қочишга уринган пайтда қўлга олинган лаҳзалари ҳам тасвирларга тушган. Шунингдек, гумонланувчилар фойдаланган таксини бошқарган шахс ҳам қўлга олинган. Шу тариқа иш бўйича ҳибсга олинганлар сони 3 нафарга етган.