“Қиролларни тан олмаймиз”. Колумбия Трампга жавоб қайтарди

Колумбия Президенти Густаво Петро АҚШ Президенти Дональд Трампнинг “Колумбия назоратдан чиқиб кетди” деган баёнотига кескин жавоб қайтарди.

“Албатта, у назоратдан чиқди – лекин ўзининг назоратидан! Демократияда ҳукумат халқка бўйсунади, Трампга эмас. У Колумбиянинг қироли эмас, биз эса бу ерда қиролларни тан олмаймиз, нуқта”, деди Петро маҳаллий телеканалга берган интервьюсида. 

У бу сўзларни Оқ уй раҳбари уни “наркотрафик етакчиси” деб атаган айбловига изоҳ сифатида айтди.

Петронинг таъкидлашича, республикаларда ҳеч ким ўзини қиролдек тута олмайди. 

“Бу ерда қироллик даъвоси билан келганларга бошқача муносабатда бўлишади. Мен буни рамзий маънода айтяпман – бизда ўлим жазоси йўқ. Лекин қиролларга бўйсунмаймиз ва ҳеч қандай қирол бу ерда ҳеч кимни сукут сақлашга мажбур қилолмайди. XXI асрда ҳам баъзилар ўзларини қирол ё губернатор деб ўйлайди, лекин республикаларда бу имконсиз”, деди Колумбия раҳбари.

Петро АҚШ айблаётган Кариб денгизи орқали гиёҳванд моддалар ташиш билан боғлиқ кемалар ҳақида ҳам тўхталиб ўтди. 

“Бизнинг ҳудудий сувларимизда бўлган-бўлмаганини аниқлаяпмиз, лекин бизга координаталарни беришмаган. Бундай вазиятда давлат раҳбари нимани қилиши керак – жим туриб тиз чўкишми ёки инсоний қадр-қиммат билан гапиришми? Биз халқаро ташкилотларга мурожаат қиламиз ва миллий суверенитетимизни ҳимоя қиламиз”, деди у.

Дипломатик низо фонида АҚШга ён бериш нияти йўқлигини таъкидлаб, Петро шундай деди:

“Мен ён бермайман, мен талаб қиламан. Агар Колумбия борини берган бўлса, энди унда ортиқ бериладиган нарса қолмади”.

Президент, шунингдек, Колумбия АҚШнинг Венесуэлага босқин уюштириш режаларини қўлламаслигини очиқ баён қилди:

“Трампни менинг Колумбия армияси иштирокида АҚШнинг Венесуэлага босқинини қўлламаслигим ғазаблантирмоқда. Йўқ жаноблар, қайси ақлли колумбиялик ўз қардошлари, жиянлари ёки Венесуэлада яшовчи 4 миллион ҳамюртларига қарши боради? Улар Ғазодагидек ўлдирилиши учунми?” деди у.

Шунингдек, Петро АҚШнинг Колумбиядаги вақтинчалик вакили Жон Макнамара билан Боготадаги президент саройи Каса-де-Нариньода учрашув ўтказди.

АҚШ ОАВ маълумотларига кўра, Трамп аввалроқ Колумбияни “бутун дунё оилаларини заҳарлаётган гиёҳванд моддалар ишлаб чиқариш ва тарқатишда” айблаган. Оқ уй раҳбари: “Колумбия назоратдан чиқди ва унинг тарихи учун энг ёмон президент – Густаво Петро, муаммоларга тўла ва онгида мувозанат йўқ одам”, деб баёнот берган эди.

Трамп илгари Петрони “ноқонуний наркосавдо етакчиси” деб атаб, Колумбияга молиявий ёрдамни тўхтатишни эълон қилганди. Унга кўра, Петро наркосаноатни “мамлакатнинг энг йирик тармоғига” айлантирган.

АҚШ Президенти Петродан “наркокартелларни ёпишни” талаб қилган, акс ҳолда “қаттиқ чора кўриш” билан таҳдид қилган. Бунга жавобан Петро: “Трамп ўз атрофидагилар ва маслаҳатчилари томонидан чалғитилган”, деб айтган. Сентябрь ойида АҚШ Колумбияни гиёҳвандликка қарши курашда “етарли ҳаракат қилмаган давлатлар” рўйхатига киритди.