Калифорниядаги музейдан мингдан ортиқ экспонат ўғирлаб кетилди

АҚШнинг Калифорния штати Окленд шаҳридаги музейда юз берган ўғрилик оқибатида мингдан ортиқ артефакт йўқолди. Бу ҳақда “The Oakland Side” хабар берди.

Қайд этилишича, ҳодиса жорий йилнинг октябрь ойи ўрталарида содир бўлган. Жиноятчилар музейнинг асосий биносидан ташқарида жойлашган сақлаш омборига бостириб кирган. Улар турли буюмларни, жумладан, заргарлик буюмлари, маҳаллий америкаликларга оид саватлар ва дагеротипларни (илк фотографик суратлар) ўғирлаб кетган.

“Ўғрилик пайтида омборда ходимлар бўлмаган, бироқ бино ичида видеокузатув камералари ва сигнализация тизими ишлаган”, дейди музей ижрочи директори Лори Фогарти.

Музей ходимлари ўғирланган артефактларнинг умумий қийматини аниқлаш устида ишламоқда. Мазкур маданий муассасанинг коллекцияси 2 миллиондан ортиқ артефактни ўз ичига олади ва Окленд шаҳрига тегишли.

Маълумот учун, бу Окленд музейида содир бўлган биринчи ўғрилик эмас. 2012 йилнинг охири ва 2013 йилнинг бошида ҳам музей икки марта талон-торож қилинган. Жиноятчилардан бири Андре Тейр Франклин 2014 йилда қиймати 800 минг долларлик заргарлик қутисини ва музейдан ўғирланган бошқа буюмларни сотгани учун тўрт йилга озодликдан маҳрум этилган.

Эслатиб ўтамиз, аввалроқ жорий йилнинг 19 октябрь куни иш вақти давомида ниқоб кийган жиноятчилар Луврга кириб, императорлик коллекциясига мансуб тўққизта экспонатни, жумладан, Наполеон ва унинг рафиқаси Жозефинага тегишли заргарлик буюмларини ўғирлаган эди. Ўғриликдан етган зарар 88 миллион еврога баҳоланган.

Воқеадан Бир ҳафта ўтиб, Луврдан заргарлик буюмларини ўғирлашда гумон қилинаётган тўрт кишидан икки нафари қўлга олинган. Улардан бири Париждаги Руасси – Шарль-де-Голл аэропортида, Жазоирга учадиган самолётга чиқиш пайтида ҳибсга олинган. Иккинчиси эса Сена-Сен-Дени департаментида қўлга олинган.