Хавфли жиноятчи 4-марта қамоқхонадан қочиб кетди

Жорий йилнинг 7 декабрь куни жиноятчилар орасида “қочиш устаси” сифатида танилган шахс Европадаги қамоқхонадан тўртинчи бор муваффақиятли қочди. Бу ҳақда “The Times” хабар берди.

Нашрнинг ёзишича, ўғрилик ва бошқа жиноятлар учун 2048 йилнинг октябригача озодликдан маҳрум қилинган 41 ёшли Албания фуқароси Таулант Тома Милан шаҳридаги қаттиқ тартибли “Опера” қамоқхонасидан қочиб кетган. У камерадаги панжараларни кесиб, бир-бирига боғланган чойшаблар орқали деразадан пастга тушган, сўнгра олти метр баландликдаги девордан ошиб, ғойиб бўлган. 

Италия ҳукумати кенг кўламли қидирув ишларини бошлаган. Хусусан, патруль ва чегараларда назорат кучайтирилган. Терговчилар маҳбус ташқаридан ёрдам олган-олмаганини аниқлаш учун кузатув камераларидаги ёзувларни кўриб чиқмоқда.

Маълумотларга кўра, у биринчи бор 2009 йилда Терни шаҳридаги қамоқдан қочган. Энг машҳур ҳодиса эса 2013 йилда содир бўлган. Ўша пайтда у Парма қамоқхонасини ҳамроҳ маҳбус билан бирга тарк этган. Италия полицияси уни 40 кун қидирган, кейин у Бельгияда қўлга олинган, бироқ Тома экстрадицияни кутмасдан яна қамоқдан қочиб кетган.

Маҳаллий нашрларнинг ёзишича, ҳозирда “Опера” қамоқхонаси ҳаддан ташқари тўлиб кетган. У ерда зарур бўлган 811 ходим ўрнига атиги 533 киши ишлайди.

Эслатиб ўтамиз, аввалроқ АҚШнинг Нью-Орлеан шаҳридаги қамоқхонадан 11 нафар маҳбус қочиб кетганди. Орлеан адлия марказидан қочган эркакларнинг тўрт нафари қотилликда айбланган. Хусусан, 2018 йилнинг кузида шаҳар фестивалида икки кишини ўлдирган ва икки кишини яралаган Деррик Гровес қамоқдан қочиб кетган.