Луврнинг ўмарилиши бўйича янги тахминлар пайдо бўлди

Франция ҳуқуқни муҳофаза қилиш органлари Лувр музейидан ўғирланган тақинчоқларнинг тақдирига оид иккита асосий тахминни кўриб чиқмоқда. Жиноятчилар уларни яширин жойга беркитиб қўйган бўлиши ёки буюртмачи топшириғи билан чет элга олиб чиқиб кетган бўлиши мумкин. Бу ҳақда кеча, 27 октябрь куни полицияга таяниб, “Europe 1” радиостанцияси хабар берди.

Полиция касаба уюшмаси вакили Акселя Ронданинг сўзларига кўра, ҳуқуқ-тартибот идоралари ҳали ҳам талончиликда иштирок этган яна икки гумонланувчини қидирмоқда. Радиостанциянинг қайд этишича, жорий йилнинг 25 октябрь оқшомида қўлга олинган гумонланувчилар ҳанузгача сўроқ қилинмоқда, уларнинг ҳибс муддати эса икки марта узайтирилган. Иккала шахс ҳам ҳозирча сукут сақламоқда.

Шунингдек, кеча, 27 октябрь куни BFMTV телеканалининг хабар беришича, бу гумонланувчилар Лувр талончилиги содир этилишидан аввал ҳам ҳуқуқни муҳофаза қилиш органларига маълум бўлган. “Le Parisien” газетаси маълумотига кўра, гумонланувчилардан бири Франция ва Жазоир фуқаролигига эга, иккинчиси эса келиб чиқиши малилик Франция фуқароси. 

Қайд этиш жоиз, 1793 йилда очилган ва илгари қироллик саройи бўлган Лувр ҳали ҳам дунёдаги энг кўп ташриф буюриладиган музей бўлиб қолмоқда.

Эслатиб ўтамиз, жорий йилнинг 19 октябрь куни иш вақти давомида ниқоб кийган жиноятчилар Луврга кириб, императорлик коллекциясига мансуб тўққизта экспонатни, жумладан, Наполеон ва унинг рафиқаси Жозефинага тегишли заргарлик буюмларини ўғирлаган эди. Ўғриликдан етган зарар 88 миллион еврога баҳоланганди.

Бир ҳафта ўтиб, Луврдан заргарлик буюмларини ўғирлашда гумон қилинаётган тўрт кишидан икки нафари қўлга олинган. Улардан бири Париждаги Руасси – Шарль-де-Голл аэропортида, Жазоирга учадиган самолётга чиқиш пайтида ҳибсга олинган. Иккинчиси эса Сена-Сен-Дени департаментида қўлга олинган.

Париж прокуратураси гумондорларнинг қўлга олинганини тасдиқлаган. Лор Бекко, шунингдек, полиция кузатув камераларидан фойдаланган ҳолда, жиноятчиларнинг икки скутердаги ҳаракат йўлини аниқлашга муваффақ бўлганини билдирган эди.

Моҳичеҳра Қадамова