Луврдаги талончилик иши бўйича гумондорлар қўлга олинди 

Франциянинг Лувр музейидан ўғирланган миллий қимматбаҳо тошлар – “қироллик гавҳарлари” иши бўйича гумондорлар кеча, 25 октябрь куни  кечқурун Париж яқинида қўлга олинди. Бу ҳақда “Le Parisien” газетаси хабар берди.

Париж прокурори Лор Бекконинг айтишича, гумондорлардан бири Парижнинг шимолида жойлашган Шарль де Голль аэропортида мамлакатни тарк этиш арафасида ушланган. Прокурор ўз баёнотида неча киши қўлга олингани ёки бошқа тафсилотларни ошкор этмади.

19 октябрь куни Париждаги Лувр музейидан ўғирлаб кетилган бебаҳо артефактлар орасида Наполеон томонидан иккинчи рафиқасига ҳадя қилинган 1 000 дан ортиқ бриллиант ва тошлардан ясалган зумрад маржон, шунингдек, “беқиёс” қийматга эга бошқа хазиналар ҳам бор.

Ўғрилик Луврнинг юқори қаватида жойлашган Аполлон галереясида амалга оширилган – айнан шу ерда Франциянинг тож зеблари сақланади. Франция Маданият вазирлиги маълумотига кўра, ҳаммасини жами етти дақиқада амалга оширган ўғрилар иккита юқори хавфсизликдаги витрина шишаларини бузиб, тўққизта буюмни олиб қочган. Полициянинг айтишича, улар мотоциклларда ҳудуддан қочиб кетган.

Содир этилган ўғрилик оқибатида етказилган зарарнинг дастлабки баҳоси 88 миллион еврони ташкил этади

Эслатиб ўтамиз, Лувр музейининг айрим қимматбаҳо тақинчоқлари ўғриликдан сўнг хавфсизлик мақсадида Франция Марказий банки биносига  топширилганди.