Мадагаскар Президенти мамлакатдан қочиб кетди 

Мадагаскар Президенти Андри Радзуэлина ёшлар намойишлари фонида мамлакатдан қочиб кетди. Бу ҳақда “Reuters” агентлиги хабар берди.

Парламентдаги мухолифат етакчиси Ситени Рандрианасолониайконинг маълум қилишича, Ражоэлина 12 октябрь куни армия бўлинмаларининг бир қисми дезертирлик қилиб, намойишчиларга қўшилганидан сўнг Мадагаскарни тарк этган.

Президент оммавий норозиликлар чоғида халққа мурожаат қилиб, ўз ҳаётини сақлаб қолиш учун хавфсиз жойга кетишга мажбур бўлганини айтган. У ўз жойлашувини ошкор этмаган, бироқ “Мадагаскарнинг вайрон бўлишига йўл қўймаслигини” таъкидлаган.

Дипломатик манбага кўра, Президент истеъфога чиқишни рад этган.

Ҳарбий манбаларнинг хабар беришича, Радзуэлина 12 октябрь куни Франция ҳарбий самолётида мамлакатни тарк этган. У француз мавқедоши Эммануэль Макрон билан келишув асосида эвакуация қилинган. Шу билан бирга, Франция ҳукумати Мадагаскарнинг ички ишларига аралашмаслигини билдирган.

Макрон Мадагаскар раҳбарига мамлакатдан чиқиб кетишда ёрдам бергани ҳақидаги маълумотларни ҳозирча тасдиқлай олмаслигини айтган ва мамлакатда конституциявий тартибни сақлашга чақирган.

Ҳарбий манбага кўра, 12 октябрь куни Мадагаскардаги Сент-Мари аэропортига Франция армиясининг Cаса самолёти қўнган. 

“Беш дақиқадан сўнг вертолёт келиб, йўловчини Cаса самолётига олиб кетди”, деган суҳбатдош. 

У йўловчи Президент Радзуэлина бўлганини қўшимча қилган.

Маълумот учун, 2025 йил 9 сентябрь куни Ражоэлина норозилик намойишлари фонида ҳукуматни тарқатиб, бош вазир Кристиан Нтсайни истеъфога чиқарган эди. Бироқ орадан кўп ўтмай, у “хорижий кучлар”ни тартибсизликларга аралашишда айблади. 6 октябрь куни эса у генерал Руфина Зафисамбони янги бош вазир этиб тайинлади.

12 октябрь куни намойишчилар Миллий ассамблеядан 48 соат ичида Радзуэлинага ишонч билдириш масаласини кўриб чиқишни талаб қилиб, парламентни тарқатиб юбориш билан таҳдид қилган. Шу куни Президент мамлакатда давлат тўнтаришига уриниш бошланганини эълон қилган.

Сентябрь ойи охирида Мадагаскарда “З авлоди” вакиллари томонидан ҳукуматга қарши норозилик намойишлари бошланган эди. Дастлаб улар пойтахт Антананаривуда ўтган бўлиб, иштирокчилар сув ва электр таъминотидаги доимий узилишлардан норози бўлган. Орадан кўп ўтмай, намойишлар бошқа йирик шаҳарларга ҳам тарқалди ва иштирокчилар президентнинг истеъфоси, сенат ҳамда сайлов комиссиясини тарқатиб юборишни талаб қила бошлади.

Намойишчилар ҳукумат аъзоларининг уйлари, супермаркетлар ва банк бўлимларини вайрон қилган. Полиция бунга жавобан кўздан ёш оқизувчи газ ва резина ўқлардан фойдаланган. БМТ маълумотларига кўра, намойишларнинг дастлабки тўрт кунида камида 22 киши ҳалок бўлган, 100 дан ортиқ киши жароҳатланган.

Эслатиб ўтамиз, аввалроқ Z-авлоднинг талаби билан Непалнинг биринчи аёл бош вазири тайинланганди.