Мирзиёевга Трампнинг табриги етказилди

Ўзбекистон Президенти Шавкат Мирзиёев бугун, 28 август куни мамлакатда амалий ташриф билан бўлиб турган Америка Қўшма Штатлари Президенти Дональд Трампнинг глобал шерикликлар бўйича махсус вакили Паоло Замполлини қабул қилди. Бу ҳақда Ўзбекистон раҳбарининг матбуот хизмати хабар берди.

АҚШ маъмуриятининг юқори мартабали вакили Мирзиёевга Трампнинг самимий саломи ва Ўзбекистон мустақиллиги куни муносабати билан табрикларини етказган.

Учрашувда Ўзбекистон билан АҚШ ўртасидаги стратегик шериклик ва кўп қиррали ҳамкорлик муносабатларини янада кенгайтириш масалалари атрофлича кўриб чиқилган.

Турли даражаларда самарали алоқалар давом этаётгани алоҳида мамнуният билан қайд этилган. 

“Конструктив сиёсий мулоқот ривожланмоқда, фаол парламентлараро алмашинувлар амалга оширилмоқда. Ўтган ойда Конгрессда Ўзбекистон куни доирасидаги тадбирлар ўтказилди, бу йил кузда кенгайтирилган стратегик шериклик мулоқотининг биринчи йиғилиши бўлиб ўтади”, дейилади хабарда. 

Қайд этилишича, мамлакатлар ўртасида хавфсизлик, терроризм, экстремизм ва ноқонуний миграцияга қарши курашиш борасида самарали ҳамкорлик йўлга қўйилган.

“АҚШ анъанавий равишда Ўзбекистоннинг муҳим иқтисодий ҳамкори ҳисобланади. 2024 йилда товар айирбошлаш ҳажми 15 фоизга кўпайди. Лойиҳалар портфели 11 миллиард доллардан ошган. Жорий йил июнь ойида ўтказилган Тошкент инвестиция форумида АҚШнинг 100 дан ортиқ етакчи компаниялари иштирок этди”, дейилади хабарда.

Минерал ресурслар, авиация, электротехника, қишлоқ хўжалиги, рақамли технологиялар, молия, инновациялар, таълим ва бошқа устувор йўналишларда кооперация лойиҳаларини илгари суриш учун катта салоҳият мавжудлиги қайд этилган.

С5+1 формати доирасида минтақавий ҳамкорликни ривожлантириш муҳим экани таъкидланган.

Бўлажак мулоқотлар ва қўшма тадбирлар режаси ҳам кўриб чиқилган.