Неймарнинг отаси Пеле брендини сотиб олди

Бразилиялик футболчи Неймарнинг отаси, Неймар да Силва Сантос NR Sports компанияси орқали афсонавий футболчи Пеле бренди ҳуқуқларини қўлга киритди. Битим 18 миллион АҚШ долларини ташкил этади. Бу ҳақда UOL нашри хабар берди.

Манбага кўра, келишув қиймати 18 миллион долларни ташкил этади ва расман жорий йилнинг 19 ноябрь куни эълон қилиниши кутилмоқда. Битим Пеле брендидан фойдаланиш ҳуқуқини, уч карра Жаҳон кубоги чемпиони Пеленинг суратлари ва номини, маҳсулот лицензияларини, тарихий архивлар ва бошқа активларни ўз ичига олади. Янги ҳамкорлик режалари эса кейинроқ маълум қилинади.

Музокаралар муаммосиз ўтган, чунки Пеле 2022 йил 29 декабрда вафот этганидан бери брендидан тўлиқ фойдаланилмаган.

Шунингдек, Неймар да Силва Сантос компанияси Пеле фаолият юритган “Вила Белмиро” стадионидаги VIP ўриндиқларни янгилаш харажатларини ҳам қоплаган. Барча ўриндиқлар алмаштирилган, янги ҳожатхоналар ўрнатилган ва кондиционер тизими жорий қилинган.

Қайд этиш жоизки, Пеле “Сантос” сафида ҳозирда Неймарга тегишли бўлган 10-рақамда ўйнаган.

Маълумот учун, Пеле “Сантос” сафида 1956–1974 йилларда 643 та ўйинда майдонга тушиб, 619 та гол урган, клуб билан уч карра Либертадорес кубоги ва икки карра Интерконтинентал кубокни қўлга киритган ва тарихдаги энг самарали тўпурар сифатида бир неча мавсум давомида ўртача 1 голли ўйин кўрсаткичини сақлаб келган.