Озодликка чиққан Шукуров яна қамалди

Тошкент шаҳридаги тунги клуб олдида эркакни бир уриб, комага тушириб қўйган, безорилик ва бир қанча фирибгарликларда айбланган Акмал Шукуровга 8 йиллик қамоқ жазоси берилганига қарамай 8 ойликдан сўнг озодликка чиққанидан хабарингиз бўлса керак. У апелляция инстанцияси судининг 9 декабрдаги ажрими билан озодликка чиқарилганди. Жамоатчиликнинг кўп сонли эътирозидан сўнг Тошкент шаҳар прокуратураси тафтиш тартибида протест киритди. Протестда Акмал Шукуровга нисбатан апелляция суди томонидан чиқарилган ажримни бекор қилиниши келтирилган.

Шунингдек, протестда Акмал Шукуровга биринчи инстанция суди жиноят ишлари бўйича Мирзо Улуғбек туман судининг ҳукмини ўзгартириб, Жиноят кодексининг 168-моддаси (фирибгарлик) 4-қисми “а” банди билан тайинланган жазони ўзгартириб, Жиноят кодексининг 104-моддаси (қасддан баданга оғир шикаст етказиш) 2-қисми “е” банди ва 277-моддаси (безорилик) 3-қисми “г” банди билан тайинланган озодликдан маҳрум қилиш жазосини ўзгаришсиз қолдириш сўралган.

Бугун, 18 декабрь куни мазкур жиноят иши Тошкент шаҳар судининг 3 нафар судьядан иборат тафтиш ҳайъати томонидан қайта кўриб чиқилиб, прокуратура протести қаноатлантирилган. Эълон қилинган ажримга кўра, биринчи инстанция судининг ҳукми ўзгартирилган ҳамда апелляция инстанция судининг ажрими бекор қилинди.

Акмал Шукуровга Жиноят кодексининг 168-моддаси 4-қисми “а” банди билан жиноят доирасида етказилган моддий зарарнинг ўрни қопланганлиги сабабли ушбу кодекснинг 57-моддасини қўллаган ҳолда, иш ҳақининг 20 фоизини давлат даромадига ушлаб қолган ҳолда 3 йил муддатга ахлоқ тузатиш ишлари жазоси тайинланди.

Шунингдек, Акмал Шукуровга Жиноят кодексининг 104-моддаси 2-қисми “е” банди билан тайинланган 5 йил муддатга озодликдан маҳрум қилиш жазоси ҳамда 277-моддаси 3-қисми “г” банди билан тайинланган 3 йил муддатга озодликдан маҳрум қилиш жазоси аслича қолдирилиши белгиланган.

Шу тариқа, Акмал Шукуровга тайинланган жазоларни қисман қўшиш йўли билан 6 йил муддатга озодликдан маҳрум қилиш жазоси тайинланди. Унинг қамоқда сақланган кунлари тайинланган жазодан чегирилиб, ўташ учун 5 йил-у 3 ой 12 кун муддатга озодликдан маҳрум қилиш жазоси қолдирилди.

Тошкент шаҳар судининг ушбу ажрими устидан тарафлар қонунда белгиланган тартиб ва муддатда Олий суднинг жиноят ишлари бўйича судлов ҳайъатига тафтиш тартибида шикоят бериш ва протест келтиришга ҳақлилиги маълум қилинди.

Ушбу видеорепортажни QALAMPIR.UZ’нинг YouTube’даги саҳифасида томоша қилишингиз мумкин.