Роналду жамоадошларига қимматбаҳо соат совға қилди

Футбол юлдузи Криштиану Роналду Португалия терма жамоасининг Миллатлар лигасидаги ғалабасини нишонлаш мақсадида ҳар бир жамоадошига “Jacob & Co” компаниясидан махсус тайёрланган ҳашаматли соат совға қилди. Бу ҳақда “Sports Casting” нашри хабар берди.

Ҳисоботларга кўра, ушбу ноодатий совғаларнинг ҳар бири 280 мингдан 400 минг долларгача қийматга эга. Журналист Нуно Лузнинг маълум қилишича, Роналду бу ноёб соатларни ўзининг яқин дўсти машҳур соатсоз Жейкоб Арабога шахсан буюртма қилган.

Ҳар бир футболчига ўз исми билан безатилган ушбу совғалар Роналду томонидан Арманистонга қарши 2026 йилги Жаҳон чемпионати саралаш учрашуви олдидан юборилган. “Ал Наср” юлдузи, шунингдек, фожиали автоҳалокатда вафот этган Диого Жота хотирасига ҳурмат бажо келтириб, шу турдаги соатни марҳум футболчининг оиласига ҳам юборган.

Жота ҳалок бўлишидан бир ойча олдин Португалия билан Миллатлар лигаси финалида испанларни мағлуб этган таркибда майдонга тушган эди.

Криштиану Роналду Жотанинг дафн маросимида қатнашмагани учун баъзи мухлислар томонидан танқидга учраганди. Бироқ у кейинчалик Пирс Морганга берган интервьюсида бу қарорини изоҳлаб, эътиборни марҳумнинг оиласидан чалғитишни истамаганини айтган:

“Одамлар мени кўп танқид қилишади, лекин мен бунга эътибор бермайман. Виждонингиз пок бўлса, одамлар нима деяётганидан қўрқишингиз шарт эмас. Отам вафот этганидан бери бошқа қабристонга бормаганман. Қаерга борсам ҳам, атрофимда цирк бўлади, мен эса оилага тинчлик беришни истадим”, дея қарорини изоҳлаган эди Роналду.

Эслатиб ўтамиз, аввалроқ Криштиану Роналду ва Жоржина Родригесларнинг узоқ кутилган тўй маросими Роналдунинг туғилган шаҳри Фуншалда бўлиб ўтиши, никоҳ маросими 2026 йилги Жаҳон чемпионатидан кейин ёзда Фуншал католик черковининг йирик марказий ибодатхонасида ўтказилиши, зиёфат эса ҳашаматли меҳмонхонада давом эттирилиши ҳақида хабар берилган эди.