Россия Украинадаги урушни якунлаш учун энг муҳим шартни айтди

Украина Қуролли кучлари Москва ва Киев ўртасидаги можарони ҳал этиш учун Донбасс ҳудудини тарк этиши лозим. Бу ҳақда кеча, 23 январь куни Россия Президенти матбуот котиби Дмитрий Песков журналистлар билан ўтказилган навбатдаги брифингда маълум қилди.

“Россиянинг позицияси маълум: Украина Қуролли кучлари Донбасс ҳудудини тарк этиши керак. Бу можарони тартибга солишнинг муҳим шартларидан биридир”, деган Кремль вакили.

Песковнинг таъкидлашича, тинчлик музокаралари доирасида кун тартибида қолаётган бошқа масалалар ҳам мавжуд.

Ўтган йилнинг декабрь ойида Украина Президенти Владимир Зеленский ҳам АҚШ Донбасснинг Украина назоратидаги қисмидан ўз қўшинларини олиб чиқишни Россия билан тинчлик келишувининг шартларидан бири сифатида илгари сураётганини айтганди. Унинг сўзларига кўра, АҚШ таклифига биноан Россия қўшинлари ҳам Донбасснинг ушбу қисмига кирмаслиги керак.

Зеленский мазкур ташаббусни адолатсиз деб баҳолаган ва Украина қўшинлари чекинган тақдирда Россия Қуролли кучлари ҳам худди шундай қадам ташлаши лозимлигини таъкидлаган.

Эслатиб ўтамиз, ўтган йилнинг охирларида Россия Президенти Владимир Путин ҳали ҳам Анкориж саммитида келишиб олинган муайян ён беришларга тайёрлигини айтганди. Бу келишувдан Донбассдан Украина қўшинларининг чиқиб кетиши ҳам жой олган.