Россия уруш қурбонларининг дафн маросимларига рекорд миқдорда маблағ ажратди

2025 йилда ҳукумат Россия аскарлари хотирасига бағишланган ёдгорликлар учун камида 111 миллион рубль (тахминан 1,5 млн доллар) ва Украинада ҳалок бўлганларнинг дафн маросимлари учун 17,8 миллион рубль (тахминан 239 млн доллар) ажратган. Бу ҳақда кеча, 23 январь куни “Вёрстка” хабар берди.

Қайд этилишича, Россия ҳукумати Украинага қарши урушда қатнашганларни хотирлаш учун ёдгорликлар қуриш, шунингдек, қўшни мамлакатга бостириб кириш пайтида ҳалок бўлган россиялик аскарларининг дафн маросимларини молиялаштириш учун тахминан 130 миллион рубль ажратган. 

2025 йилда Россия ҳарбий хизматчиларини дафн этиш билан боғлиқ шартномалар кўпинча Новосибирск вилояти, Коми Республикаси ва Чукотка автоном округига берилган. Бироқ журналистларнинг айтишича, давлат харидлари портали Украинадаги уруш иштирокчиларининг дафн маросимлари учун давлат ва турли ташкилотлар томонидан ажратилган маблағларнинг фақат бир қисмини қайта ишлайди.

Урушда Россиянинг йўқотишлари ҳақидаги тахминлар турлича. 2025 йил декабрь ойида НАТО Украинага тўлиқ кўламли бостириб кириш бошланганидан бери ҳалок бўлган ва яраланган Россия қўшинларининг умумий сонини тахминан 1,15 миллионга, қурбонлар сони эса 250 мингга етганини тахмин қилган. Украина Қуролли кучлари Бош штаби урушда 1,2 миллиондан ортиқ Россия аскари ҳалок бўлгани ва яраланганини тахмин қилмоқда.

НАТО Бош котиби Марк Рютте жорий йилнинг 21 январь куни Швейцариянинг Давос шаҳрида бўлиб ўтган Жаҳон иқтисодий форумида нутқ сўзлаб, фақат 2025 йил декабрь ойида Украинага қарши урушда 30 мингдан ортиқ россиялик аскар ҳалок бўлганини айтган. 

Россия Мудофаа вазирлиги узоқ вақтдан бери ўз қурбонлари ҳақида расмий ҳисоботларни эълон қилмаган. Бироқ январ ойининг ўрталарига келиб, BBC рус хизмати журналистлари урушда ҳалок бўлган 163 мингдан ортиқ рус аскарлари рўйхатини тузишга муваффақ бўлган.

Эслатиб ўтамиз, аввалроқ Россия Украинадаги урушни якунлаш учун энг муҳим шартни айтгани ҳақида хабар берилганди. Кремль вакилига кўра, Россиянинг позицияси маълум, Украина Қуролли кучлари Донбасс ҳудудини тарк этиши керак. Бу можарони тартибга солишнинг муҳим шартларидан биридир.