Санкт-Петербург мигрантларнинг иккита ишни қилишига тақиқни узайтирмоқчи

north_east

Россияда мигрантларга қарши яна бир таклиф берилди

Санкт-Петербург расмийлари ишлаш учун рухсатномаси бўлган меҳнат мигрантларига нисбатан таксичилик ва курьерлик хизматларида ишлашга қўйилган тақиқни 2026 йилгача узайтирмоқчи. Бу ҳақдаги қарор лойиҳаси кеча, 13 ноябрь куни губернатор Александр Беглов томонидан коррупцияга қарши экспертиза кўриб чиқиши учун тақдим этилди.

Санкт-Петербург Меҳнат ва бандлик қўмитасига 2026 йил 1 августгача губернаторга тақиқни 2027 йилгача узайтириш мақсадга мувофиқлиги тўғрисида ўз фикрларини тақдим этиш топширилди.

Мигрантларнинг такси ҳайдовчиси бўлиб ишлашига тақиқ жорий йилнинг июль ойи охирида жорий қилинган ва у 2025 йилнинг охиригача давом этади. Смолний бу қарор “такси хизматларининг сифати ва хавфсизлигини ошириш ҳамда Россия фуқаролари учун қўшимча бандлик имкониятларини яратишга қаратилган” деб изоҳлади. Тақиқ 8 ноябрдан тўлиқ кучга кирди. Бозор иштирокчиларининг сўзларига кўра, чекловлар шаҳарда ҳайдовчилар сонининг 12 фоизга қисқаришига олиб келган.

Мигрантларнинг курьер сифатида ишлашини тақиқлаш (шунингдек, дастлаб фақат 2025 йилнинг охиригача) 11 август куни эълон қилинган эди. Евроосиё иқтисодий иттифоқи шартномасига мувофиқ, Беларусь, Қозоғистон, Арманистон ва Қирғизистон фуқаролари Россияда патент ёки меҳнат рухсатномасисиз ишлаши мумкин. Демак, ушбу тақиқ, асосан, ўзбекистонлик ва тожикистонлик меҳнат мигрантларига тааллуқли.

“Ушбу қарор норасмий бандликка қарши курашиш, курьерлик соҳасида хизматлар сифати ва хавфсизлигини ошириш, Россия фуқаролари, биринчи навбатда, ёшлар ва талабалар учун янги иш ўринларини яратишга қаратилган”, таъкидлади Смолний.

Эслатиб ўтамиз, аввалроқ Россияга ишлаш учун борган меҳнат мигрантларининг ойлик маошидан ортиқ миқдордаги пулни ватанига ўтказишни тақиқловчи қонун лойиҳаси Давлат думасига кўриб чиқиш учун киритилганди.