Тошкентда 6 минг абонент “свет”га тўлов қила олмайдиган бўлди

Тошкентда чиқинди хизматидан қарздор 6 минг абонентнинг электрга тўлов қилиши учун вақтинча чеклов ўрнатилди. Бу ҳақда Чиқиндиларни бошқариш ва циркуляр иқтисодиётни ривожлантириш агентлиги хабар берди. 

Маълум қилинишича, жорий йилнинг 5 ноябрь куни Тошкент шаҳри бўйича чиқинди хизматларидан юзага келган қарийб 2 млрд 239 млн сўм дебитор қарздорлик учун жами 25 минг 121 та абонент “Ҳудудий электр тармоқлари” АЖнинг “2100” қисқа рақамидан SMS хабарнома орқали огоҳлантирилган. Ушбу огоҳлантириш юборилганидан кейин 5 кун ичида қарздорликни бартараф этмаган 6 мингта абонентнинг электр энергияси учун тўлов қилиш имкониятига вақтинча чеклов жорий этилган. 

Билдирилишича, айни пайтда Тошкент шаҳри кесимида чиқинди хизматларидан жами 582 млн сўмдан ортиқ дебитор қарздорлик мавжуд.

Қайд этилишича, мазкур чеклов қарздорлик бартараф этилиши биланоқ дарҳол ечилади.
Маълумот учун, ушбу тартиб 2025 йилнинг 30 июнигача бўлган қарздорликларга татбиқ этилмайди. 2025 йилнинг 1 июлидан чиқинди хизматларидан шаклланган қарздорликлар учун жорий йилнинг 5 ноябридан бошлаб қўлланилмоқда. 

Мазкур тартиб жорий йилнинг декабрь ойидан бошлаб республиканинг қолган ҳудудларида ҳам жорий этилади.

Эслатиб ўтамиз, аввалроқ Тошкент шаҳрида чиқиндиларни белгиланмаган жойларга ташлаган ва санитария қоидаларини бузган шахсларга нисбатан 2 миллиард сўмдан ортиқ маъмурий жарималар қўлланганди.