Трамп Ҳормузни миналардан тозалаш бошланганини эълон қилди

АҚШ Президенти Дональд Трамп Америка ҳарбийлари Ҳормуз бўғозини миналардан тозалашни бошлаганини, Эроннинг барча мина ётқизувчи кемалари эса чўктирилганини маълум қилди. Бу ҳақда у ўзининг Truth Social тармоғидаги саҳифасида ёзди.

“Биз Ҳормуз бўғозини миналардан тозалаш жараёнини бошламоқдамиз. Уларнинг флоти йўқ қилинди, ҳарбий-ҳаво кучлари тор-мор этилди, зенит техникаси мавжуд эмас, радарлари ишламаяпти, ракета ва дрон заводлари ракета ва дронларнинг ўзлари билан бирга деярли йўқ қилинди ва энг муҳими – уларнинг кўп йиллик “етакчилари” энди орамизда йўқ”, деб ёзди Трамп. 

Трампнинг сўзларига кўра, эндиликда Хитой, Япония, Жанубий Корея, Франция, Германия ва бошқа кўплаб давлатларга хизмат сифатида Ҳормуз бўғозини тозалаш жараёни бошланади.

“Ақл бовар қилмайди, лекин уларда бу ишни мустақил равишда бажариш учун на жасорат ва на ирода бор”, дейди Трамп.

Эслатиб ўтамиз, аввалроқ Эрон ҳалигача Ҳормуз бўғозини тўлиқ оча олмаётгани, чунки у ерга ўрнатилган барча денгиз миналарини аниқлолмаётгани ва уларни тезкор зарарсизлантириш имкониятига эга эмаслиги ҳақида хабар берилган эди.