Трамп Чикагога аскарларни жўнатди

АҚШ Президенти Дональд Трамп Иллинойс штатидаги Чикаго шаҳрига 300 нафар Миллий гвардия аскарларини юборишга рухсат берди. Бу ҳақда Оқ уй матбуот котиби Кэролайн Ливиттнинг ўринбосари Эбигейл Жексон маълум қилди.

Унинг сўзларига кўра, Миллий гвардия кучлари Чикагога федерал ходимларни ва давлат мулкини ҳимоя қилиш учун юборилмоқда. 

“Президент Трамп Америка шаҳарларини вайрон қилаётган воқеаларга кўз юма олмайди”, деган Жексон. 

Трамп бу қарорни бир неча ҳафта давомида бундай чоралар кўриш билан таҳдид қилганидан кейин ва маҳаллий сиёсатчиларнинг норозилигига қарамасдан қабул қилган.

Ички хавфсизлик вазири Кристи Ноэм ижтимоий тармоқда Чикагода ҳуқуқни муҳофаза қилувчи органлар ходимларига ҳужум қилинганини, уларни ўнта автомобиль тўсиб қўйгани, ҳатто улардан бирида қуролланган шахс бўлгани ҳақида ёзган. Унинг айтишича, вазиятни назоратга олиш учун қўшимча махсус кучлар юборилган. 

4 октябрь куни “Reuters” нашрининг ёзишича, Чикагонинг жануби-ғарбида юзлаб намойишчилар АҚШ Божхона ва чегара хизмати ходимлари билан тўқнашган. Шундан сўнг ходимлар қуролланган аёлга қарата ўқ узган. Аёл АҚШ фуқароси бўлиб, шахси ҳозирча ошкор қилинмаган, у ўз оёқлари билан шифохонага борган. Унинг аҳволи ҳақида ҳозирча маълумот йўқ. Тўқнашув чоғида федерал агентлар кўздан ёш оқизувчи газ ва резина ўқлар қўллаган. Ҳуқуқ-тартибот идоралари ходимларидан жиддий жароҳат олганлар йўқ.

Дональд Трампнинг Оқ уйга қайтганидан кейин АҚШда миграция сиёсати кескин кучайтирилди. Июнь ойида Сан-Францискода ўтказилган рейдлар оммавий норозиликларга сабаб бўлган ва тартибсизликларга айланиб кетган. Шундан сўнг, Трамп Калифорнияга юзлаб Миллий гвардия ходимлари ва денгиз пиёда аскарларини юборган, бу эса штат расмийларининг эътирозига сабаб бўлган.

Эслатиб ўтамиз, аввалроқ АҚШнинг Иммиграция ва божхона назорати хизмати ходимлари Чикаго марказида бир неча кишини ҳибсга олганди.