Трамп Шавкат Мирзиёевни ҳам Тинчлик кенгашига таклиф қилди

Ўзбекистон Республикаси Президенти Шавкат Мирзиёев номига Америка Қўшма Штатлари Президенти Дональд Трампдан Яқин Шарқда тинчликни мустаҳкамлаш ва можароларни ҳал этиш юзасидан халқаро ташаббусга қўшилиш бўйича расмий таклиф келиб тушди. Бу ҳақда Ўзбекистон етакчисининг матбуот котиби маълум қилди.

Мактубда қайд этилишича, ушбу ташаббус 2025 йил 29 сентябрда эълон қилинган ва жаҳон етакчилари томонидан қўллаб-қувватланган, шунингдек, БМТ Хавфсизлик Кенгашининг 2025 йил 17 ноябрдаги 2803-сонли Исроил ва ҲАМАС томонидан келишилган Ғазо сектори учун тинчлик режасини амалга ошириш юзасидан резолюция билан маъқулланган Ғазодаги можарони тугатиш бўйича комплекс режага асосланади.

Ташаббуснинг асосий мақсади узоқ муддатли тинчлик, барқарорлик ва хавфсизликни шакллантириш учун масъулиятни ўз зиммасига олишга тайёр бўлган давлатларни бирлаштиришга қаратилган янги халқаро тузилма – Тинчлик кенгашини тузишдан иборат.

Ўзбекистон Республикасига Тинчлик кенгашига таъсисчи давлат сифатида қўшилиш таклиф этилган.

Билдирилишича, Ўзбекистон раҳбари америкалик мавқедоши жавоб мактубини йўллаб, унда Ўзбекистон Тинчлик кенгашига таъсисчи давлат сифатида қўшилишга тайёрлигини билдирган.

Президент ўз мактубида ушбу ташаббусга Яқин Шарқдаги кўп йиллик низоларни ҳал этиш, кенг минтақада тинчлик ва барқарорликни таъминлаш йўлидаги муҳим қадам сифатида қаралаётганини таъкидлаган.

Эслатиб ўтамиз, АҚШ Президенти Дональд Трамп жорий йил 16 январда Ғазо секторида Тинчлик кенгаши тузилишини эълон қилган эди. Ушбу тузилмани ташкил этиш Трампнинг Ғазо бўйича тинчлик режасининг бир қисми бўлиб, унда халқаро кучларни жойлаштириш ҳам назарда тутилган. Бирлашманинг ижроия қўмитаси таркибига АҚШ Давлат котиби Марко Рубио, Трампнинг махсус вакили Стив Уиткофф, Президентнинг куёви Жаред Кушнер ҳамда Буюк Британиянинг собиқ бош вазири Тони Блэр киради.

Вашингтон Тинчлик кенгашида иштирок этиш учун 50 та давлат раҳбарларига, жумладан, Аргентина, Канада, Франция, Германия, Австралия, Баҳрайн, Миср, Туркия ва Исроил, Россия етакчиларига таклиф юборган. Қозоғистон Президенти Қосим-Жомарт Тўқаев ҳам таклиф олган.  

“Bloomberg” маълумотларига кўра, АҚШ Ғазо сектори бўйича халқаро Тинчлик кенгашида доимий ўрин олишни истаган давлатлардан камида 1 миллиард доллар бадал киритишни сўрамоқда. Ижроия кенгашининг биринчи раиси Трампнинг ўзи бўлиб, ташкилот аъзолигига кимни қабул қилиш масаласини айнан у ҳал қилади. Тинчлик кенгашига аъзо бўлган ҳар бир давлат уч йилдан ортиқ бўлмаган муддатга тайинланади ва битта овозга эга бўлади. Кенгаш қарорлари кўпчилик овоз билан қабул қилинади, бироқ уларнинг барчаси раис – Трамп томонидан тасдиқланиши шарт.