Трампни ўлдиришда айбланаётган эркак Эрон томонидан ёлланган – ОАВ

АҚШда Дональд Трампни ўлдиришни режалаштирганликда айбланаётган покистонлик эркак судда Эрон томонидан мажбурланганини маълум қилди. Бу ҳақда “The New York Times” хабар берди.

Айбланувчи Асиф Мерчант суд жараёнида Эроннинг Ислом инқилоби қўриқчилари корпуси билан ихтиёрий ҳамкорлик қилмаганини, балки Теҳрондаги оиласини ҳимоя қилиш учун бу ишга мажбурланганини таъкидлаган.

АҚШ Адлия вазирлиги Мерчантни Трамп ва бошқа америкалик сиёсатчиларга қарши суиқасд режасини амалга оширишда айбламоқда. Расмийларнинг фикрича, бу режа АҚШ зарбаси оқибатида ҳалок бўлган Эроннинг Ислом инқилоби қўриқчилари корпуси қўмондони Қосим Сулаймоний ўлими учун қасос олиш мақсадида ишлаб чиқилган.

Хабарларга кўра, Мерчант судда ўзига аниқ бир шахсни ўлдириш бўйича буйруқ берилмаганини айтган. Бироқ унинг яна бир эронлик ҳамкори уч кишининг номини тилга олганини билдирган. Улар – Дональд Трамп, АҚШ собиқ Президенти Жо Байден ва республикачилар сиёсатчиси Никки Хейли.

Асиф Мерчант 2024 йилда ўтказилган махфий операция вақтида ҳибсга олинган. Суиқасд бўйича суд жараёни АҚШ Президенти Дональд Трамп Исроил билан биргаликда Эронга қарши ҳужумлар уюштиришни буюрганидан бир неча кун олдин бошланган. Ушбу ҳужумда Эроннинг олий раҳбари Оятуллоҳ Али Хоманайи ва бир қатор юқори лавозимли амалдорлар ҳалок бўлган.

Трамп ҳам Мерчантни Эронга алоқадор суиқасд фитнасини уюштирганликда гумон қилмоқда. 

“Мен Хоманайини у мени қўлга олишидан олдин ўлдирдим”, деган АҚШ Президенти.

Прокурорлар эса Мерчантнинг мажбурланганига оид даъволарини рад этиб, бунга далиллар йўқлигини маълум қилган. Агар у айбдор деб топилса, умрбод қамоқ жазосига ҳукм қилиниши мумкин.

Эслатиб ўтамиз, аввалроқ АҚШ ҳарбийлари мамлакат Президенти Дональд Трампга қарши суиқасд режасига алоқадор деб ҳисобланган эронлик амалдорни йўқ қилгани ҳақида хабар берганди.