Трампни ўлдирмоқчи бўлган шахс умрбодга қамалди

АҚШ суди Президент Дональд Трампга суиқасд қилишга уриниш иши бўйича айбдор деб топилган Райан Раутни умрбод қамоқ жазосига ҳукм қилди. Бу ҳақда “Reuters” хабар берди.

59 ёшли Раут 2025 йилнинг сентябрь ойида беш банд бўйича айбдор деб топилган. Айбловлар орасида қотилликка суиқасд қилишга уриниш, ўқотар қуролни ноқонуний сақлаш ҳамда қўлга олиш вақтида федерал офицер фаолиятига тўсқинлик қилиш бор. Суд жараёнида Раут ўзини ўзи ҳимоя қилган.

15 сентябрь куни Махфий хизмат агентлари Трамп жойлашган гольф-клуб ҳудудидаги панжара яқинида, буталар орасида яширинган ва қўлида милтиқ бўлган эркакни пайқаган. Раут бирорта ҳам ўқ узмасдан воқеа жойидан қочиб кетган. Бир оз вақт ўтгач, у кузатув камералари орқали аниқланиб, қўлга олинган. Мазкур ҳодисани республикачи номзодга суиқасд қилишга уриниш сифатида баҳоланган.

Раут суддан ўзига 27 йил қамоқ жазоси тайинлашни сўраган. Бироқ, айблов томони умрбод қамоқ жазосини талаб қилган. Суд ҳужжатларида прокурорлар Раутнинг жиноятлари “шубҳасиз умрбод қамоқ жазосига лойиқ”, деб кўрсатган. Уларнинг таъкидлашича, Раут қотилликни бир неча ой давомида режалаштирган, йўлида ким учраса ҳам ўлдиришга тайёр бўлган ва ҳеч қандай пушаймонлик ёки афсус билдирмаган.

Раутнинг ўзи эса Трампни ўлдириш нияти бўлмаганини айтган ва шахсият бузилиши билан боғлиқ муаммолар сабабли қамоқда психологик даволанишдан ўтишга тайёр эканини билдирган. Шунингдек, у судда етарли даражада ҳуқуқий ҳимоя таъминлай олмагани сабабли судьялар иш материаллари бўйича нотўғри хулосага келган бўлиши мумкинлигини таъкидлаган.

Трампга суиқасд қилишга уринишлар сайловолди кампанияси давомида бир марталик ҳодиса бўлмаган. Хусусан, 13 июль куни Пенсильвания штатида бўлиб ўтган митинг чоғида 20 ёшли Томас Метью Крукс қўшни бинонинг томида яшириниб, Трампга милтиқдан ўқ узган. У Махфий хизмат ходимлари томонидан отиб ташланган. Трампни ўлимдан қутқариб қолган ҳолат шундан иборат эдики, ўқ узилган пайтда у АҚШдаги ноқонуний миграция ҳақидаги маълумотлар акс этган экранга қараш учун ўнг томонга бурилган ва ўқ фақат сиёсатчининг ўнг қулоғини енгил жароҳатлаган.