Трампнинг сурати тангаларда пайдо бўлади

АҚШ Молия вазирлиги мамлакатнинг 250 йиллик юбилейи муносабати билан АҚШ Президенти Дональд Трамп тасвирланган 1 долларлик танга ишлаб чиқаришни режалаштирмоқда. Бу ҳақда АҚШ Ғазначиси Брэндон Бич ўзининг Х ижтимоий тармоғидаги саҳифасида хабар берди.

Танганинг олд томонида Трампнинг сурати тасвирланади. Юқорида “Озодлик” сўзи, ўртада эса АҚШнинг шиори “In God We Trust” (Биз Худога ишонамиз) сўзлари ёзилади. Пастки қисмида 1776–2026 йиллар (АҚШ Мустақиллик декларациясининг 250 йиллиги) кўрсатилади.

Танганинг орқа томонида Америка байроғи фонида мушт кўтарган Трамп тасвирланган. Юқорида “Жанг, жанг, жанг” сўзлари, пастда эса “Америка Қўшма Штатлари” сўзлари ва АҚШнинг яна бир шиори “E Pluribus Unum” (лотинча “Кўпдан битта”) мақоли туширилади.

“Бу ерда фейк хабар йўқ. АҚШнинг юбилейини нишонлаш учун 1 долларлик танганинг якуний дизайни ҳали танланмаган бўлса-да, бу биринчи қоралама. Биз тез орада танга дизайни бўйича якуний хулосага келамиз”, деб ёзган АҚШ Ғазначиси Брэндон Бич.

Эслатиб ўтамиз, аввалроқ Буюк Британияда марҳум қиролича Елизавета II хотирасига етти мингта олмос билан безатилган улкан танга яратилган эди.

Бунёд Келдибоев