Венесуэлага ҳужумга буйруқ Оқ уйдан берилгани айтилмоқда

Трамп маъмурияти бугун, 3 январь куни Венесуэла пойтахтида содир бўлган портлашлардан хабардор. Бу ҳақда Оқ уйда аккредитациядан ўтган “CBS News” мухбири Женнифер Жаcобс ўз манбаларига таяниб хабар берди. 

“Манбаларга кўра, Трамп маъмурияти расмийлари бугун эрталаб Венесуэла пойтахти Каракас устидан портлашлар ва самолётларнинг парвозлари ҳақидаги хабарлардан хабардор”, деб ёзган у Х (собиқ Twitter)да. 

Шунингдек, журналист АҚШ Президенти Дональд Трамп Венесуэладаги нишонларга, жумладан, ҳарбий иншоотларга зарба беришни буюрганини маълум қилди. 

Унинг ёзишича, бу ҳаракат Трамп маъмуриятининг Венесуэла Президенти Николас Мадурога қарши кампаниясининг кескин кучайишини англатади.

“The Wall Street Journal”га кўра, Венесуэла пойтахтидаги иккита муҳим аеропортда портлашлар содир бўлган, бу АҚШ Президенти Дональд Трамп мамлакатга зарбалар беришни буюргани ҳақидаги хабарлар тарқалгани билан бир вақтда рўй берган. 

Ижтимоий тармоқларда жойлаштирилган видеолавҳаларда Каракас марказидан 24 километрдан камроқ масофада жойлашган Симон Боливар халқаро аэропортида кучли портлашлар кузатилган. Гувоҳларнинг сўзларига кўра, пойтахт шарқидаги ҳарбий ва хусусий рейсларга хизмат кўрсатадиган кичикроқ объект бўлган Ла Cарлота аэропорти ҳам зарбага учраган. Воқеа жойидан олинган кадрларда ундан тутун кўтарилаётгани кўрсатилган. 

“The New York Times”нинг ёзишича, Оқ уй эса Венесуэла пойтахтидаги портлашлар ҳақида изоҳ беришдан бош тортган.