Вилоятликлар ҳам Тошкентда таксичилик қила олади – Илҳом Маҳкамов

Эндиликда вилоятдан келган таксичилар Тошкент шаҳрида таксичилик қила олади. Бироқ бунинг учун улар лицензия олиши, фаолият манзили сифатида эса Тошкентни кўрсатиши керак бўлади. Бу ҳақда бугун, 13 июнь куни Транспорт вазири Илҳом Маҳкамов маълум қилди.

Унинг айтишича, вилоятлараро лицензияга эга таксичилар Тошкентда такси қила олмайди. Лицензия фақат битта ҳудудга берилади. 

Улар бир вақтнинг ўзида ҳам вилоятда, ҳам пойтахтда таксичилик фаолияти билан шуғуллана олмайди.

Маълумки, Вазирлар Маҳкамасининг тегишли қарори билан ҳайдовчиларнинг машина рақами қайси ҳудуддан олинган бўлса, фақатгина ўша ҳудудда таксичилик қилиши мумкинлиги белгиланган. Ушбу қарор тез орада кенг жамоатчиликнинг эътирозларига сабаб бўлди.

Ўзбекистон Халқ демократик партияси Транспорт вазиридан йўналишсиз такси фаолияти билан шуғулланишга оид жорий қилинган чекловга тушунтириш бериши учун сўров юборди. Партияга кўра, бу тартиб Ўзбекистоннинг янги қабул қилинган Конституциясининг 67-моддасида белгиланган талабга зид келмоқда.