Chexiya hukumati iste’foga chiqdi

Bugun, 6 noyabr kuni Chexiya Bosh vaziri Petr Fiala boshchiligidagi hukumat o‘z yig‘ilishida iste’foga chiqish to‘g‘risida qaror qabul qildi. Bu haqda hukumat rahbariga tayanib, ČTK xabar berdi.

Petr Fialaning so‘zlariga ko‘ra, u bugun, 6 noyabr kuni iste’fo haqidagi arizasini mamlakat prezidenti Petr Pavelga topshiradi. Chexiya konstitutsiyasiga ko‘ra, hukumat mamlakat parlamentining quyi palatasi – Deputatlar palatasining yangi tarkibi shakllangach iste’foga chiqadi. Ushbu palata saylovlari joriy yilning 3-4 oktyabr kunlari bo‘lib o‘tgan.

Kutilishicha, Prezident amaldagi hukumatga yangi kabinet tuzilmaguncha o‘z vazifalarini bajarishda davom etishni topshiradi. Yangi hukumat kechiktirmay, keyingi oy o‘rtalarigacha ish boshlashi kerak. Joriy yilning 3 noyabr kuni ANO, SPD va Motorist partiyalari oktyabr boshidagi parlament saylovlarida ko‘pchilik ovozga ega bo‘lib, hukumat koalitsiyasini tuzgan.