Deputatlikka nomzodning qizi va jiyani ovozlarni sotib olishda gumon qilinmoqda

Qirg‘izistonda Jogorku Kenesh deputatligiga nomzodning qizi va jiyani ovozlarni sotib olishda gumon qilinib, ularga qidiruv e’lon qilindi. Bu haqda AKIpress xabar berdi.

Bishkek Ichki ishlar bosh boshqarmasining Ekstremizm va noqonuniy migratsiyaga qarshi kurashish boshqarmasi tezkor xodimlari bir guruh shaxslarning saylovchilarga aniq bir nomzodga ovoz bergani uchun pul mukofotlari taklif qilgan noqonuniy faoliyatini fosh qildi.

Qirg‘iziston Jinoyat kodeksining 196-moddasi (ovozlarni sotib olish) bilan qo‘zg‘atilgan jinoyat ishi doirasida mamlakat parlamenti deputatligiga nomzod A.L.ning yaqinlari ovozlarni sotib olish bilan shug‘ullangani aniqlangan. Tergov ma’lumotlariga ko‘ra, bu qarindoshlar uning 37 yoshli qizi va 27 yoshli jiyani ekani ma’lum bo‘lgan.

Nomzodning saylovoldi shtabiga poraxo‘rlik uchun 360 ming som berilgan. Shundan so‘ng gumonlanuvchilar saylovchilarga pora berish sxemasini qanday tashkil etish bo‘yicha ko‘rsatmalar bergan. O‘z navbatida, ular saylovchilar ro‘yxatini olgan.

Gumonlanuvchilar qidirilmoqda.

Eslatib o‘tamiz, avvalroq Qirg‘iziston Bosh vaziri o‘rinbosari, Milliy xavfsizlik davlat qo‘mitasi raisi Qamchibek Tashiyev ommaviy axborot vositalariga bergan intervyusida Jogorku Kenesh (parlament) deputatligiga ayrim nomzodlar mamlakat rahbariyatining qo‘llab-quvvatlashi yoki duosini olgani haqidagi mish-mishlarga izoh bergandi. U nomzodlarni qonunbuzarliklar aniqlansa, “jazo qattiq bo‘lishidan” ogohlantirgandi.