Qodirov chechenlarning urushdagi ishtiroki bo‘yicha Putinga hisobot berdi (video)

Kecha, 7 may kuni Rossiya Prezidenti Vladimir Putin Moskvada Checheniston rahbari Ramzan Qodirov bilan uchrashdi. Bu haqda Kreml xabar berdi.

Uchrashuv chog‘ida Putin Qodirovga so‘nggi yillardagi faoliyati natijalari bilan “faxrlanishi” mumkinligini aytdi.

“Albatta, respublika rahbari sifatida siz so‘nggi yillarda amalga oshirilgan ishlar natijalaridan xursand bo‘lishingiz va faxrlanishingiz mumkin: “Bu mutlaqo ochiq-oydin narsa”, dedi Putin Qodirovga.

Uchrashuv Qodirov iste’foga chiqishni so‘raganini e’lon qilganidan keyin bo‘lib o‘tdi. Kreml e’lon qilgan matnga ko‘ra, yig‘ilishda iste’foga chiqish haqida gap bo‘lmagan.

Checheniston rahbari Prezidentga mintaqaning iqtisodiy yutuqlari va ishsizlikning qisqarishi haqida hisobot berdi. Putin va Qodirov Ukrainadagi harbiy harakatlarni muhokama qildi: boshlanganidan buyon zonaga 55,5 ming jangchi yuborilgan, ulardan 21,6 ming nafari ko‘ngillilar.

Qodirov “Chechnya Today” nashriga bergan intervyusida lavozimidan ozod etilishini o‘zi so‘ragani va iltimosi qo‘llab-quvvatlanishini aytgan edi.

Checheniston rahbari bir necha bor iste’foga chiqish istagini bildirgan. 2022 yilda u o‘z lavozimida juda uzoq vaqt qolganini va cheksiz va uzoq ta’tilga loyiqligini aytdi. Biroq, 2023 yilda u yana bir muddatga nomzodini qo‘yishni rejalashtirganini aytdi.

Eslatib o‘tamiz, avvalroq Rossiya Prezidenti Vladimir Putin iste’fo so‘ragan Checheniston rahbari Ramzan Qodirov bilan uchrashishi haqida xabar berilgandi.